Mizoram Pradesh Congress Committee (MPYCC) chuan nimin khan thuchhuah siamin Mizoram sorkar chu grape wine chungchangah kalphung mumal nei lo niin an sawi.
Tun kar Thawhlehnia Chief Minister Zoramthanga’n Champhai Grape Winery a tlawh tuma ‘Project mumal tak siamin hma kan la ang’ tia a sawi chauh chu vanduaithlak an tih thu an sawi.
MPYCC hian kum 2007-a MIP sum hmanga bul lo tanpui tawhtuin vawiina hmalakna mumal an la nei miah lo leh hmalakna thar tur a la sawi leih leih chauh mai chu grape chingtute hmakhua tih tak takna nena an beihpui lohzia tilangtu a nih bakah, hmui chauha kut hnathawktute hmangaih thin tih buichhia laih loin a inpuang nia an hriat thu an tar lang.
May 27, 2022-a excise minister thupek anga Millennium Centre-a Champhai Winery siam chhuah grape wine zuartu, Lalhriatpuii (L) bungrua an mansak chu, Mizoram sorkarin grape wine chungchangah kalphung mumal nei chiang lo a, grape chingtute leh lamah fuih chung siin, lehlamah an siam chhuah mansak leh si an nih avangin an dinna tichiang tur leh, Lalhriatpuii (L) bungrua pe let vek tur leh zangnadawmna pe turin Mizoram sorkar an ngen nawn leh thu an tar lang bawk.