Mizoram Health System Strengthening Project (MHSSP) kalpuina atan MHSSP leh MHIP Gen. Hqrs-in thawhdunna thuthlung an ziak.
MHSSP leh MHIP te thawhdunna tur thuthlungah hian MHSSP aiawhin Project Director Dr Eric Zomawia leh MHIP aiawhin President Ngurmawii Sailo ten hming an ziak a, hriatpuituah MHIP General Secretary Lalliani’n hming a ziak bawk.
He thawhdunnain a tum ber chu Mamit district-a MHIP branch hrang hrangte kaltlanga MHSSP component pahnih hnuaia hmalakna kalpui niin, hei hian insurance enrollment tam thei ang ber nei tura hmalakna leh natna inkaichhawn theih loh (non communicable disease) chungchang zau zawka inzirtirte a huam.
Nakum January leh March inkarah MHIP branch hruaitu thlan bikte zirtirna pek hmasak phawt an ni ang a, April leh June inkarah huam zau zawka inzirtirna kalpui tum a ni.
MHSSP Project Director Dr Eric Zomawia chuan World Bank sum hmanga health department hnuaia mipui hriselna tur project, MHSSP kalpui mekah hian health department hmunhma, office leh district hospital tihchangtlun te, sorkar enkawl damdawi in hrang hrangte damdawi in tha nihna certfication nei tura hmalak leh health insurance pawimawhna inzirtir te, cancer, zunthlum leh nantna benvawn dang chungchang inzirtir te a tel thu a sawi a. MHIP nen thawhdunna thuthlung an ziak thei chu lawmawm a tih thu a sawi.
MHIP President Ngurmawii Sailo pawhin sorkarin mipui hriselna tur project pawimawh tak a kalpuinaa MHIP-te hman tangkai an ni tur chu lawmawm a tih thu leh an tih theih chinah chuan project hlawhtlinna tura theihtawp chhuah an tum thu a sawi bawk.