Aizawl : Home Minister Lalchamliana’n tunlai khawvel thlirin ram leh hnam humhalh tura tharum thawh a rem loh na tam tak a awm tawh tih sawiin, kawng dang dap a tul thu leh a pawimawh ber zinga pakhat chu mahni intodelha, midang rinchhan lova dinchhuah a nih thu a sawi.
India zalen champha vawi 75-na lawmna kalzelah Pachhunga University College-a Mizo deptt. leh Social Welfare & Tribal Affairs deptt. tangkawpin -Vai len leh Mizote : Hman pasaltha te hnuhma- tih thupui hmanga Zirtawpni kaltaa seminar an buatsaih a hawnnaah Home Minister chuan he thu hi a sawi a. Zirna leh thiamna lamahte, ei leh bara intodelh kawngahte, infiamna kawngahte theihta- wp chhuaha, mi thawh chhuah ringa khawsa lova, mahni kutchhuak ngei ringa intungnung thei tura theihtawp chhuah a tul thu a sawi.
Home Minister chuan Central YMA in hlemhletna (corruption) do kawnga tanlak a tum avanga lawmawm a tih thu a sawi bawk.
Seminar hawnna in- khawmah hian Human Resources Development Board Vice-Chairman L. Thangmawia pawhin thusawiin, “Vai len tum hnih kan tawk a, tun thlenga min nghawng dan hi a sawihnawm dan tan sawi tur a tamin a rinawm a, chutih lai erawh chuan Mizote Kristian sakhua min rawn petu a nihna hi a ropui a ni, a ti.
L Thangmawia chuan “Kristian sakhua min dinsak bakah hmun hrang hranga pem darh Mizote rorelna huangkhatah min chhungkhawmin Mizo hnam min din saka, kan duhthusamin la fam- kim rih lo mahse, kan thang zel ang a, Pathianin hnamkhata min din chhoh meknaah hian kan chian vek hunah midangte chungah kan la leng ngei dawn a ni”, a ti.
Mizo Language Bo- ard pawh a taka hnathawk thei tura chak taka hmalak a nih thu sawiin, inkaihhruaina dan pawh peihfel tawh a nih thu leh post creation buaipui mek a nih thu L Thangmawiia chuan a sawi a. He board hi Mizo tawng tihhausak leh humhalh kawngah tangkai tak a nih dawn bakah Mizo hnam inpumkhatna atan pawh tangkai tak a nih tur thu a sawi bawk.
Seminar thupui sawi hawngtu Prof. Jangkhongam Dougel, Mizoram University-in Vai len thawhkhatna leh thawhhnihnain Zo hnahthlak peng hrang hrangte a nghawng dan zirchianna a sawifiah a. Mizote chanchin chu khawvel hriatah sapho leh vaihovin an ziak nasat thu leh Mizote ziak zirchianna mumal leh chipchiar hmuh tur awm mumal lo chu pawi a tih thu sawiin, “keimahni chanchin hi kan zirchiana kan ziah a tul tawh a ni” a ti.
Mizo subject zirlaite leh thiamna bik neite chovin Prof. Jangkhongam Dougel chuan “mahni subject ni lo subject dang fumfe si lova thlur tel vak ai chuan mahni subject bikah a tawp thleng rat thei tura kan inzir a ngai” a ti a. Ph.D degree neiha dawhkana thut chhunzawm duhtawk mai lova an thiamnate field-a luhchilhpui ngam a tul tawh thu leh chu chuan Mizote khawvelin a hmuh dan pawh a her dik zel theih tur thu a sawi bawk a ni.
Seminar hawnna inkhawmah hian lehkhabu pahnih tlangzarh a ni a, Home Minister Lalchamliana’n Department of Mizo, Pachhunga University buatsaih ‘Mi Pangate chanchin tawi – Mizo Hnam pasalthate’ (A short biography of five Mizo freedom fighters) a tlangzarh a, he lehkhabu hi Mizo tawng leh sap tawnga buatsaih a ni. HRD Board Vice Chairman L. Thangmawia’n Lalzuitluanga, Asst. Professor, Department of Mizo, Pachhunga University leh- khabu ziah ‘Mizo Thufingte zirzauna – An analytical study of Mizo proverbs’ a tlangzarh thung.