Chelsea manager Graham Potter chuan a hnathawhna hmun ni thinah a team thar a hruai lut a, an duh loh dan taka awmin 4-1 in Brighton & Hove Albion in an lo sawp.
Amex Stadium-ah Brighton fans ten an pu hlui leh a team-te thawm ring tak nen an lo au khum thin a. Khelmualah pawh Seagulls zawk an che tha.
Inkhel tan atanga minute nga na lekah Leandro Trossard chuan Brighton goal hmahruai a khung a. First half-ah an goal nawr a tlang tumin hlauhawm thei hle in Chelsea player Ruben Loftus-Cheek leh Trevoh Chalobah ten an lamah goal an khung ve ve phah.
Second half-ah Blues tan Kai Havertz chuan goal khungin Blues tan beiseina siam mahse engah an chhuah thei lova. Inkhel tawp hma in Brighton bawkin goal khung belhin Pascal Gross chuan an goal hnuhnung ber a khung.
Brighton hi season liamta khan Potter-a hnuaiah pakuana an ni a. Tun season-ah tha taka bul an tan hnuah Potter-a’n Chelsea a pan san a. Hemi hnu hian a zawnin match nga chak hmel an hmu lo.
Brighton manager Roberto de Zerbi chuan, “Player te, club leh fans te tan ka lawm hle. Fans te khan inkhelah nasa takin min pui.”
“Kan tan result lawmawm a ni a, mahse han lawm chiam erawh ka duh lo. Inrinni ah kan inkhel leh dawn a, hetiang football hi kan khelh chhunzawm zel a pawimawh.” a ti.
Reds an pul nawn
Liverpool in season thar a UEFA Champions League khelh phak inchuhnaah midangte um turin an tan viau a ngai tawh dawn a, Nottingham Forest laka an tlawm hnuah Inrinni zanah Leeds United lakah an tlawm nawn.
Anfield-ah Jurgen Klopp-a pawlte hian table mawng lam a awm team an mikhual a. Tunhnaia an inkhel tam tak angin che chhe lo mahse an che fuh thei lo.
An tlarhnung a Joe Gomez leh goalkeeper Alisson te chetsual zarah Rodrigo chuan goal hmahruai a khung a. Hei hi minute 4-na lekah a ni.
Minute 14-naah Mohamed Salah hmangin Liverpool in an chhanglet a. Na taka goal nawr thinin team hlauhawm zawk an ni a, Leeds goalkeeper Illan Meslier che tha chuan a team a chhanhim fo.
Mahse Leeds United in ‘Leeds’ takin an khel. Thawhrimna leh tumruhna lantirin a beidawng duh miah lo. Brenden Aaronson hmanga goal bar an tihper ve hnuah huntawp dawnah Crysencio Summerville chuan an chakna goal a khung.
Liverpool manager Jurgen Klopp chuan, “Tun anga kan chetthat a kaltluan chhoh theih loh chuan Champions League khelhphak theih a ni dawn lo. Hei hi kan siamthat a ngai.”
“Tun dinhmunah hian nidang kan tluk lo hle a, hetiang dinhmun a awm hi pawi hle. Mahse kan inpawm thiam a ngai a, a siamthatna tur kawng kan dap ang.” a ti.