Brazil chuan an president hlui, Luiz Inácio Lula da Silva chu president atan thlang tlin nawn lehin far-right Jair Bolsonaro a hneh.
Campaign laiin hruaitu pahnihte leh an kaihhruaite chu nasa takin an inbei a, a tawpah Lula hian vote tla zinga 50.9% a hmu ta a ni.
A vote hmuh hi Bolsonaro-a paih thlak nan chuan a tawk a, a lamtangte chuan hnehna an chang leh dawn nia sawiin inringtawk hle mah se an tling zo ta lo.
Heti taka president inthlana inhnehtawk leh rinkai zawk awm mumal hleithei lo hi Brazil ramah chuan hriat reng a hlawh tawh rin a ni.
Lula hian inthlan hnuhnung ber, kum 2018 hun lai khan tan ina hun a hman lai a nih avang leh chuh phalsak a nih loh avangin a chuh lo va, tunah a lo kir leh ta a ni.
Brazilian construction firm pakhat hnen atangin an rama sorkar hnuaia awm oil company Petrobras-in contract an hmuh theih nan thamna a la nia puhnaah thiam loh changin tantir a ni.
Ni 580 lai tan ina hun a awm hnuah a chungthu an remna chu khin thlak leh a ni a, politics-ah a zuang lut leh ta a ni.
“Nung chunga min phum bo daih an tum a, tunah hei ka lo ding e,” tiin hnehna a chan hnua thu a sawina hmasa chu bul a tan nghe nghe.
Hnehna a chang tih puan a nih atangin ram hrang hrang hruaitu ten lawmpui thu an sawi nghal a. US President Joe Biden chuan a lawmpui rualin ‘inthlanna zalen, dik leh rintlak result’ a nih thu a sawi a. Thawhhona tha an neih zel a beisei thu a sawi bawk.
Russian President Vladimir Putin pawhin ‘a lawmpui tak zet’ tih sawiin result chuan Lula chu ‘politics-a thiltihtheihna nei’ niin a sawi.
India Prime Minister Narendra Modi pawhin thawhhona tha an neih zel a beisei thu a sawi a; UK Prime Minister Rishi Sunak pawhin, “UK leh Brazil kaihhnawih bakah ram economy thanna tur leh khawvel himna tura kan tanho zel ka beisei,” tiin Twitter-ah a tar lang.