Ramri chungchanga November 4-a Mizoram leh Assam sorkar aiawhte Guwahati-a inbe tura ruahman chu India president-in Mizoram a tlawh dawn avang leh inbiaknaa tel tur minister thenkhat an zin avangin Mizoram sorkain a hun sawt rawtna Assam sorkarah a thlen.
Home department hotuten The Zozam Times an hrilh danin state sorkar pahnih aiawhte hi November 4-ah Guwahati-ah inbe leh tura ruahman a ni a, Mizoram sorkar pawh a inbuatsaih mek laiin, President Draupadi Murmu-i’n November 4-ah Mizoram a tlawh dawn avang leh inbiaknaa tel tur Minister of State pahnih, Lalruatkima leh TJ Lalnuntluanga te an zin mek avangin November 9-11 inkar vela inbe tura rawtna Assam sorkarah an thlen a. Mizoram sorkar rawtna hi Assam sorkar chuan chanchin buatsaih lai thleng hian a la chhang lo thung.
Ramri chungchanga state pahnih inbe tur hian Mizoram sorkar chu a inbuatsaih mek a, home department hotuten an sawi danin Mizoram aiawh turte chuan Mizoram dinna chu Bengal Eastern Frontier Regulation, 1875 a nih thu leh Mizoramin hemi a pawm chhan te, a dang a pawm loh chhan te an sawi dawn a, tanchhan tur hrang hrang pawh dapkhawmin an inbuatsaih mek.
Mizoram leh Assam sorkar aiawhte hi August 9 khan Aizawlah an inbe tawh a, chumi chhunzawm nan chuan Guwahati-ah inbiak leh ni se, tia an thu dah bawhzuiin inbiak leh an tum a ni.
Ramri chungchanga state pahnih sorkar aiawhte nikum leh kumina inbiaknaah Mizoram aiawhin Home Minister Lalchamliana leh I&PR Minister Lalruatkima te bakah home department hotute an tel thin a, tun tuma inbiakna turah hian Forest Minister TJ Lalnuntluanga’n a belh ve leh dawn nia thudawn a ni.