Aizawl: Mizoram sorkara vigilance department leh Central YMA hmalaknain Vigilance Awareness Week pualin nimin tuk khan Aizawlah Walkathon buatsaih a ni.
Walkathon-ah hian Aizawl khawpui chhunga YMA branch tin atangin mi pathum zel an tel a, Sikulpuikawn atanga branch YMA 40 aiawh kalkhawmte chu ACB SP Lalsanglura’n vai liamin, Chanmari kawn atangin branch 68 aiawhte Vigilance Director Laldingluaia’n a vai liam thung a, hmun hnih atanga kalte hi Vanapa Hall kawtah intawkkhawmin inkhawm tawi buatsaih a ni.
Vanapa Hall kawta inkhawm tawi, CYMA Vice President Lalhmachhuana kaihhruaiah CYMA President R Lalngheta’n thu sawiin, Mizoram sorkarin central atanga a sum dawnte dik tak leh fel taka a hmanna tur dik takah hman ni se, tih chu mipui duh dan a nih thu a sawi.
CYMA president chuan Mizoram Police-te chu India rama police-te zingah conviction nei sang ber an nih thu leh ACB-in corruption case an chhui atangin kum 2022 chhungin case pathumah conviction a awm tawh chu lawmawm a tih thu a sawi a. Chutih rualin CBI-in Mizorama an hnu chhuiah conviction an neih thu hriat a la ni chiah lo chu nasa zawkin tan la se a duh thu a sawi.
Central sorkar thu anga corruption do tura Lokayukta din a ni pawh lawmawm a tih thu CYMA president chuan sawiin, “Hnathawk tak tak thei turin sorkar hian thuam chakin member tha tak tak ruat thuai se,” a ti.
Vigilance Awareness Week puala hun hmanah hian Mizoram State Chief Vigilance Officer, Chief Secretary ni bawk, Renu Sharma pawhin thu a sawi a. Addl. Secretary, Vigilance Deptt Lalhriatpuia kaihhruaiin kalkhawmten thu an tiam rual bawk a ni.