Aizawl: YMA Sub. Hqrs Lungleiin an rel tawh angin Aizawl-Thenzawl-Lunglei (ATL) Road dinhmunte an enfiah a, lungawina khawp hmalakna a awm lo nia an hriat avangin an hmalak zel dan tur zanin hian an rel dawn.
Thawhtanni khan YMA Sub Hqrs., Lunglei hruaitute chuan ATL Road chhe lai thawm thata hmalakna a awm leh awm lohte an enfiah a. Kawng chu siam ni ve deuh mah se an beisei anga siam that a la nih loh avangin lungawina khawpa hmalakna a awm lo nia an hmuh avangin hmalak zui zel nise tiin, an hmalak zui zel dan tur ngaihtuaha sawiho turin zanin hian an pisa-ah executive committee meeting an nei dawn.
Tar lan tawh angin, October 18 khan ATL Road siam that phutin YMA Sub. Hqrs., Lunglei hian lungawi lohna lantirin No Vehicle Day an puang a. He ni an hman pawhin awmzia a nei loa ngaiin an beisei anga kawng siam tha tura mawhphurtute atangin thu leh hla engmah an dawn loh bakah, siam tha tura bul tanna hmel rintlak hmuh tur a awm loh avangin October 31, 2022 thleng ngaihchana, hemi ni hian hmalakna awm leh awm lohte enfiah an lo rel tawh a ni.