All Mizoram Petrol Dealers Association (AMPEDA)-in Tuirial Airfield Venga tank lorry chetsual avanga chhiatna rapthlak tak a thleng chu pawi an tih thu an sawi a. He vanduaina thleng atang hian oil kang hlauhawmzia mipuiin hre thar se an duh thu leh he chhiatna thleng chungchangah hian nimin khan police-in thubuai an ziah luh thu an sawi.
Inrinni kalta tlaia tank lorry chesual leh kangmei chhuak chungchangah AMPEDA hruaitute chuan nimin khan Aizawl Press Club-ah thuthar thehdarhtute kawmin, an president, Lalnghakliana’n tanker kang avanga mi paliin nunna an chân leh mi dang thahnem takin hliam na tak an tuar chu pawi an ti hle tih a sawi.
AMPEDA president chuan hetiang vanduaina rapthlak hi a thlen tawh lohna turin mipuiin oil kang a hlauhawmzia an hriat thar a tul thu sawiin, he chhiatna a lo thlena mi thenkhatin an remchan dan anga mi bungrua/oil bua lak tuma an inchuh chu a Mizo lo an tih thu a sawi.
Oil phur lirthei chetsualna a lo thleng leh palha an oil phurhte a neitu ni lovin an lo dawh leh a nih chuan pawl anga a tul anga hmalak an tum tawh thu AMPEDA president chuan a sawi a. “Mi thenkhat fimkhur tawk loh vang nia ngaih theiha mi paliin nunna an chân phahna kha mipuiin fimkhur an zir nan hmang thei se kan duh,” a ti.
Tanker chesuala kang chhe ta chu Silchar-a oil la, Champhai lam pan mek a nih thu AMPEDA president chuan sawiin, a thil phurh leh lirthei kang chhia chu Rs. nuai 60 man hu vel a nih thu a sawi.
AMPEDA president chuan tanker khalhtuin zu a rui nia sawi a nih thu pawh sawiin, hemi chungchangah hian an pawlin kawng hrang hranga hmalak an tum thu a sawi a. Driver ruaitu oil company pawh lehkha thawna driver-te ngei pawh fimkhur a tulzia hrilhhriat ngei an tum thu a sawi bawk.
Filling station-ah kangmei a chhuah lohna tura fimkhur a ngaihna lai sawiin, AMPEDA president chuan, mi thenkhat oil la tur, petrol pump chhunga mei zu lut maite an awm thin thu leh kangmei chhuah theihna tura fimkhur tawk lote chu oil pek loh emaw, a tul anga action lak zel emaw an tum tawh thu a sawi.
Tanker kang avanga chhiatna thleng chungchang hi police-ten an chhui fiah mek thu leh nimin khan Bawngkawn Police Station-ah thubuai ziah luh a nih thu Aizawl SP C Lalruaia’n The Zozam Times a hrilh a. Tanker chetsual thu hi Inrinni tlai dar 4:35-ah Bawngkawn PS-in report a dawng a, a rawn hrilh hretu chu Assam lam atang daih a nih thu sawiin, police-te a hmun an thlen chuan kangmei a lo chhuak hman tawh tih a sawi a. Lirthei khalhtu tlan bo ta chu an la man loh thu a sawi bawk.