Lai autonomous district council-a MDC, Mizoram state BJP Vice President ni bawk T. Zakunga’n LADC-a MNF sorkar in Mizoram state sorkar aṭangin development sum an hmu hleithei ta lo niin a sawi.
Lawngtlai district BJP te karthar inhlan na leh political session nimina neihah he thu hi Mizoram state BJP Vice President T. Zakunga chuan a sawi a. State sorkarin district council sorkar chu a duhsaklo hle tih a lang chiang nia sawiin, LADC hruaitute chu state sorkar lakah an beidawng ta hle niin a sawi.
T Zakunga chuan NEC aṭanga Lai community tana sum lo kal pawh MNF sor- karin LADC kutah a dah duh lo nia sawiin, BADP bakah SEDP leh central scheme dangte pawh LADC kuta dah pakhatmah a awm lo niin a sawi a. Council budget atang chuan mipui nawlpui chan tur sum dah theih a ni lo nia sawiin, sum awm ang ang chu hlawhah a kal ral deuh vek niin a sawi.
Budget pawnlam aṭanga duhsakna sum an dawn loh avangin, tunhmaa mirethei leh miharsate inpui ni co- uncil sorkar chu tunah chuan mirethei te pa- whin beisei tlakah an ngai ta lo niin T Zakunga chuan a sawi a. “Lairam dinhmun chhe taka awm mek chhanchhuak turin BJP kan rawn let thuai dawn a ni,” a ti.
Zoramthanga kaihhruai MNF sorkar chu hmai hnih neia a khawsak avangin central BJP sorkarin a duhsak thei tawh lo niin T Zakunga chuan a sawi a. “Central an dawr dawnin NDA partner an nih thu hahip in an sawi a, Mizorama BJP MLA erawh an thawhpui leh duh si loh avangin, Central BJP-in a duhsak thei tawh lo a ni” a ti.
T Zakunga chuan “PMJVK chungchanga minister chak tak Pu Robert Romawia Royte hmalakna hi ram mipui hmakhawngaihna vang ni lovin, mimal hmingṭhatna leh hlawkna duh van- ga hmalakna niin a lang” a ti a “PMJVK project hi mipui nawlpui chhawr phak education, skill development, sanitation etc. ah te hman ni sela, kan ṭangkaipui zawk ngei ang” a ti.
“He project an kalpui duhdan atang hian mirethei te hamṭhatna tur hmuh tur a awm lo hi a lungchhiatthlak” tiin, T Zakunga chuan “nakum inthlanah miretheite hmangaihtu BJP telna sorkar Mizoramah a din ngei a ṭul” a ti a. BJP-in an buaipui mek 125th Constitutional amendment bill 2019 (Sixth schedule amendment) chu a hmawr bawk a ni dawn hnai nia sawiin, “hun reilote hnua hlawhtlin na kan chan hunah mi ṭhenkhat te chuan he hlawhtlinna hi BJP in an dil avanga amend a ni lo’ tiin an la sawi leh duh maithei, hetianga sawi an awm chuan, an rilru puthmang a dik lova, rilru verther an put vang a ni ang” T Zakunga chuan a ti bawk.