Tun league season beisei anga la hmang lo Torino in Pathianni zanah an tana result lian tham tak an nei. Serie A champion lai AC Milan 2-1 a hnehin league table chung lamah an inhlangkai.
Stadio Olimpico Grande Torino-ah mikhual team Milan hian goal khung theihna hun an nei nual a. Ball chang tam zawk nimahsela goal an khung theih loh a tawpah an tuar.
An forward Rafael Leao chuan huntha tak a neih vawi hnih a khung thei lo. Minute 35-naah Torino in goal an khung ve thung a, defender Koffi Djidji chuan Valentino Lazaro freekick a tauh lut.
Minute hnih hnu lekah Torino goalkeeper Vanja Milinkovic-Savic chuan ball pet chhuakin hei hi Aleksey Miranchuk-a’n a la a, an goal hnihna ni turin a khung zui.
Milan tan Sergino Dest chuan second half-ah goal a khung teuh leh a, minute 67-naah Junior Messias chuan goal khat a khung ve bawk. Mahse an si phurh sutna goal an zawnin Torino an ding khawng tlat tawh.
Milan hi tun season Serie A-ah a vawi hnihna atan an tlawm a, Serie A bikah a zawna match 17 tlawm lova mikhual team ni chunga an kaltluanglai chu a tawp bawk.