Europa League a an tlawm avangin mi thenkhatin an chetthat kaltluang a tawp dawn a ang ni ten sawi hman mahse Arsenal an tho lehnghal a. Football hmuhnawm leh hlauhawm khelin Premier League table chung ber luah turin Nottingham Forest an hneh.
Pathianni zana Emirates Stadium a inkhelah Arsenal forward Gabriel Martinelli chuan minute 4-naah goal a khung nghal. Gunners tana chanchin lawmawm lo erawh goal siamtu Bukayo Saka chu inhliam avangin lakchhuah a ngai.
Amah thlaktu Reiss Nelson chuan second half tan hnu lawkah an goal hnihna a khung a, kum 2020 November hnuah a vawikhatnan Arsenal tan goal a khung.
Minute thum hnuah a goal hnihna a khung ve lehnghal a. Midfielder Thomas Partey leh Martin Odegaard ten goal an khung belh ve leh bawk.
Goal chhuah hma mahse first half bikah Forest an khel chhe hran lo. Remo Freuler leh Jesse Lingard ten Arsenal tlarhnung an tihthaih ve thei tho.
Mahse second half-ah an chhunzawm thei lova, Forest boss Steve Cooper tan chawlhlawk zawha a naute nawi ta niai chu thil lawmawm lo tak a ni ang.
Inkhel zawhah Arsenal boss Mikel Arteta chuan, “Ni thum dana inkhelh a point thum hmuh zat zat hi a harsatzia ka hria a, chuvangin kan result-ah ka lawm hle. Table chung bera awm leh hi kan tan thil tha tak a ni.”
“Saka inhliam dan kha ball inchuh dan hlauhawm tak a ni. Khelh luih tum mahse a ti lui thei lova, a dinhmun chiang zawk hriat la ni lo mahse World Cup a khelh chu kan beisei tho.” a ti.
Goal 100 khungtu Rashford
Manchester United forward Marcus Rashford chuan a club tana a goal 100-na a khung chu hnehna chan nan a tawk a. West Ham United lakah 1-0 in an chak.
United in kum 1937 atang tawhin a zawnin match 4163 chhung an youth team chhuak player-te inkhel turin an la telh ziah a. Tun kartawpah an chherchhuah ngai Marcus Rasford chu an chakpui.
Kum 24 mi hian second half hma lawkah Christian Eriksen-a ball vawrh luh duhthusam chu a tauh lut a. United chanchin a an player goal 100 khung thei 22-na chiah a ni.
United tan forward sawihlawh Cristiano Ronaldo chu Antony leh Jadon Sancho te aia bul tantir a ni a. Second half-ah chance tha tak Rashford-a’n a siamsak a khung thei lo.
Lehlamah goalkeeper David de Gea a che tha a, Michail Antonio leh Kurt Zouma te lakah save tha a siam tawh hnuah inkhel tawp hma in Declan Rice-a goal khung tur ropui takin a dang.
Mellung thar kaitu Rashford chuan, “Tunhnai inkhelah ka rilruah chuan a awm a, goal 100 han kai hun ka nghak a, ka tihlawhtling thei hi ka lawm hle.”
“Nikum lamahte harsatna hrang hranga ka paltlang a ngai a, tun season-ah erawh hetiangte a awm loh avangin ka che tha.” a ti.