Lei chim chungchangah hian hawn a nih leh hmain a himna endik tawk a ni em tih zawhna a tam hle a, thuneitute chuan a kimchanga chhui a nih tur thu an sawi.
Police-in an man zinga pakua chu lei chei that hna thawktu leh a enkawl zuitu, Oreva-a thawk an ni hlawm.
An zinga pahnih chu manager an ni a, ticket clerk pahnih, contractor pahnih leh security guard pathumte chu an hna an thawh that tawk loh leh inthlahdah vanga chhiatna thlenga puha man an ni.
Police hotu lian, Ashok Kumar Yadav chuan tualthahna lam ni lovin, mi tihhlumna lam hawia an chhui thu a sawi.
Oreva hian tihfel tawk lo tam tak an nei nia puh an ni a, heng zingah hian khaw roreltu (municipal) hnen atangin lei a him tawk tih fiahna, fitness certificate an lak loh a tel.
Oreva chuan lei chim chungchangah hian engmah sawi an la nei lo va. Mi thenkhat chuan an company-a manager lawkte pawh chhui tur zingah an tel niin an sawi.
Kum tam tak chhunga India-a chhiatna lian ber tling phak hian khaw lian lo tak, ceramic industry avanga hriat hlawh, Morbi khua pawh a tibuaiin a tichiai hle.
Thawhtanni khan mi halna an neih len pahnih chu a khat vek a, hetih lai hian dam chhuak zawn hna thawh mek a la ni bawk. Chhungkaw thenkhat, an vaia thi pawh an awm a, heng mite hi an thenawm khawvengten an hun hnuhnung an hmanpui tawp hlawm.
Thawhlehni thleng khan chin hriat loh an la awm belh zel bawk nia sawi a ni.
Pathianni zana a thianpa nena lei en tuma kal, Siddique-a chuan tun thlengin a thianpa hi a la hmuh leh tak loh thu a sawi.
“A chim lai khan lei lai velah kan awm a. Leh themah khan ka inuai tang a, engtin tin emaw ka chhuak hlauh va; mahse, ka thianpa hi khawiah nge a awm tih reng ka la hre thei lo,” a ti.