Rajasthan-a Congress party hruaitu lawk pahnihte inkarah inremna tak tak a awm thei lo va, Ashok Gehlot leh Sachin Pilot chu vantlang hriatah an inkhak leh ta a, nghawng lian a nei leh dawn em a la hriat loh.
Pilot-a hian September thlaa Congress MLA helte laka action lai ngei a phut thu leh Prime Minister Narendra Modi-a’n Thawhlehnia Chief Minister Gehlot-a a fak chu tha lo a tih thu a sawi hnu rei vak lovah Gehlot-a chuan ‘tumahin’ hetiang thu an sawi tur a nih loh thu leh tute pawhin thununna an zawm mai tur a nih thu a sawi ve nghal.
Thla rei vak lo liam taa an state politics buaina chungchangah hian Pilot tawng chhuakin AICC-in hriattirna a pek angin party chuan inthununna zawm lote laka chet lak a tul nia a hriat thu a sawi a. Modi-a’n Gehlot-a a fakna pawh sawi telin, ‘a bengvarthlak rualin ngaihzam chi a ni lo’ niin a sawi.
Pilot-a thil sawi hi Alwar-a awm mek, Gehlot chuan rang takin a chhang nghal a, “Hetiang hi an sawi tur a ni lo. KC Venugopal-a’n hetiang thu hi party miin an sawi tur a ni lo tih thu a dah a. Mi tinin inthununna an zawm kan duh,” a ti.
“Tunah hian tum lian tak pakhat kan nei a. Ram chhunga mipuite hi an inphiar a, tharum thawhna a thleng a, thil man a sang a, hna nei lo an tam bawk a; Rahul Gandhi-a pawh ni tin thui tak kalin India sorkar a nawr mek a ni,” a ti.
October thlaa Congress president thlan hma kha, September khan Rajasthan-a Gehlot-a lamtang MLA-te chuan hetih laia national president chuh tuma hming langsar ber hian inthlan a chuha chief minister nihna a bansan a nih chuan a aiawh turin Pilot-a ruat a nih chuan an ban vek tur thu sawiin assembly speaker hnenah bânna lehkha pawh an thehlut hman.
MLA rual hi an bâng tak tak a nih chuan Rajasthan-a Congress sorkar chu a tlu nghal mai dawn tihna a ni a. Party chhunga hetiang taka buaina awm hi a mawhphurhnaa ngaiin Gehlot-a hian president inthlan tur chu a thulh leh ta nge nge a, MLA rualte pawh an bâng ta lo.
Kum hnih liam taah khan Pilot-a hi a thuihhruai MLA eng emaw zat nen Gehlot-a laka lungawi lovin an lo hel tawh bawk a, hetih laia chief minister lama tang MLA rualte hi tun tuma Pilot-a chief minister a nih tur duh lotu an ni hlawm.