Jaipur-a thuthar lakhawmtuten an kawmnaah Pilot-a chuan Congress president thar, Mallikarjun Kharge-a chuan an state-a MLA helte lakah action a lak ngei a rin thu a sawi.
“Congress hi party hlun tak, tute tan pawh, senior leh junior pawh, dan inang inzawm tur nei a ni a. President thar, Mallikarjun Kharge hian action a la ngei ang,” a ti a. Party observer Venugopal pawhin ‘Rajasthan buaina’ chu chin fel a ni dawn tih a sawi bawk tih a sawi.
“Ajay Maken leh Kharge chuan kha thil kha an ngai thutakin uluk takin an thlir a, AICC pawhin inthununna awm lo niin a ngai a. Party pawhin hriattirna thawn chhuak tawhin chhan vek pawh a ni tawh a; mahse, Congress hi patu hlun a ni a, tute tan pawha zawm tur dan nei a ni,” tiin Rajasthan deputy chief minister hlui hian a sawi.
Party president thlan dawna a thuihhruai MLA-te chet dan avang hian Gehlot-a hian hetih laia party chief Sonia Gandhi-i hnenah ngaihdam a dil tih a sawi bawk.
Pilot-a hian Prime Modi-a’n chief minister a fak chungchang pawh sawi chhuakin tha a tih loh thu a sawi.
“Nimina prime minister-in chief minister a fak kha a bengvarthlak a; mahse, ngaihzam chi a ni miah lo thung. Prime minister hian hetiang bawk hian parliament-ah Gulam Nabi Azad-a a fak a, a hnua thleng zui chu kan hriat kha,” a ti.