French president hlui, Nicolas Sarkozy chu ei ruk thubuai avangin kum thum lung in tang tura hrem a ni a, kum hnih erawh tihkhawtlai a ni.
Thiam loh a channa hi kum 2014-a thil thleng a ni a. Thubuai a neih mek an chhui dan chungchanga thil awm dan (information) hriat ruk tumin a dan hre mi nen magistrate tlawna magistrate chu president pisa a chhuahsan hnuah hna tha tak pek a tiam vang a ni.
Kum 66 mi, Sarkozy hi French president hlui zinga lung in tang tura hrem hmasak ber a ni.
A dan hre mi chuan court sang zawka ngaihtuah tha leh turin a thlen (appeal) nghal tih a sawi a. Hetih chhung hian Sarkozy-a hi a zalen thei dawn a, kum tam tak pawh awh thei a la ni.
A chungchanga thu an tihtluknaah Judge Christine Mée chuan Sarkozy-a hi lung in pangngaiah ni lovin, a chin hriat theihna nen a chenna inah a tang thei dawn niin a sawi.
Conservative politician hian a thiltih kha a dik lo tih hre reng chungin a ti nia sawiin a dan hre mite pawh vantlang hmaa court rorelna hmel tibal zawngin an khawsa niin a sawi bawk.
Tun tuma court rorelna hi France chanchina chhinchhiahtlak tak a ni a. Sarkozy-a thlak tak, Jacques Chirac pawh kha kum 2011 khan kum hnih tang tura hrem niin hei pawh hi tihkhawtlai a ni a. Paris mayor a nih laia Paris City Hall sakna tura a thawhpuite duhsaka hna pek thubuai a ni a, Chirac-a hian kum 2019 khan a thihsan ta nghe nghe.