Aizawl: Aizawl Mayor Lalrinenga Sailo-in property tax chu bultan a nih tirhah dik taka thil tih ni se tuna a punna hi tam tia sawi theih a nih loh thu a sawi.
He thu hi nimina Sustainable Development Goals (SDGs) tihhlawhtlin kawnga local council thlanchhuah 19-te inelna tur, ‘Urban Indicator Framework for Localization of SDGs’ a hawnna a sawi.
Mayor chuan property tax chungchangah tun hmain data mumal leh felfai an nei lo a, self-declaration an tihin a dik lova report a tam thu a sawi a, kum eng emaw zat hnuah ennawn leh a nih avangin in sa thenkhat chuan chhawng eng emaw zat an lo belh tawh bawk a, floor area atanga chhut zel a nih avangin leh survey leh data uluk taka an lakkhawm avangin a dik thei ang berin an siam tha tih sawiin, a tirah dik taka thil tih nise a punna hi tam tia sawi theih a nih loh thu a sawi.
Lalrinenga Sailo chuan SDGs 17 zinga a hnuhnung ber, ‘hlawhtlinna chang tura thawhhona tha neih’ chu bul an tanna tur a nih thu sawiin, planning department-in ngaihtuahna tha tak senga India rama a hmasa ber ni tura Localization of SDGs an ruahman chu lawmawm a tih thu a sawi a ni.
Aizawl khawpui chhunga SDGs tihlawhtling tura hmalaknaah hian a bul tanna leh enchhinna atan AMC area-a ward hrang hrang 19 atangin local council pakhat theuh thlan an ni a. Pakhatnain Rs nuai 10, pahnihnain Rs. nuai 8, pathumnain Rs. nuai 5 an dawng dawn a, heng an lawmman dawnte hi tangkafaia pek ni lovin, a hu ang tawk khawtlang hmasawnna project siam nan hman a ni ang.
Ruahman dan chuan AMC hnuaia local council zawng zawng huapa he inelna hi la kalpui tur a ni.
He hun hi Planning Secretary Lalmalsawma Pachuau chuan a kaihruai a, ‘Urban Indicator Framework for Localization of SDGs’ chungchang inhrilfiahna bakah zawhna leh chhanna hun hman a ni a, Aizawl Deputy Mayor R. Thanglura, Municipal Corporator-te leh sorkar hotu dangte an tel a ni.