Aizawl : Lai Autonomous District Council (LADC) sorkara Environment, Forest, & Climate Change department leh Central Young Lai Association (CYLA)-in vawiin khan LADC huamchhunga ramngaw leh nungcha vemhim leh environment tha leh hrisel a awm theihna tura thawhhona tur thuthlung an ziak.
LADC CEM conference hall-a thawhhona thuthlung ziahfelna hi LADC-a Executive Secretary H. Lalruatkima’n kaihruaiin, LADC-a tlawmngaipawl lian ber leh LA- DC sorkar te ramngaw, nungcha leh environment chhe zel tur ven kawnga an thawkho tur chuan nghawng tha tak a neih ngei a beisei thu a sawi a. CYLA President HC Vanlalruatpuia pawhin YLA chuan sorkar nen an thawhho hma pawhin, an thiam danin hemi kawngah hian hma an lo la nasa tawh tih sawiin, awmze nei, kalphung mumal zawk nena hma an la tur chu an lawm thu a sawi.
CYLA President chuan ram leh hnam humhalhnaah kawng hrang hranga hmalak a nih loh chuan awmzia thui tak a nei dawn lo tih sawiin, “he rama lo awm zel turte tan chenna tlaka hnutchhiah chu tihmakmawh a ni” a ti bawk.
LADC-a Environment, Forest & Climate Change department leh CYLA thawhhona turah hian hlawm lian pasarih awmin, LADC sorkarin dan a neih te chak zawka bawhzui nana turah YLA-in a tul angin tha a thawh ang a, hmalakna a chak zawk theih nan YLA-in ruahmanna a neihte pawh sorkar nen tangduna bawhzui a ni ang. Thawhhona hian March 31, 2024 thleng a huam a, a tul anga pawhsei theih a ni dawn a ni.