- Mahmuaka Chhakchhuak
Sialsuk Joint YMA buatsaihin November 8 – 9, 2022-ah khian Sialsuk Dil (YMA TUIKHUAH) a sanghate chu a duh apiang tana man theih turin NGHAKUAI CHIAH RUNPUI an buatsaih dawn a, hemi atan hian khawtlangin an inbuatsaih mek zelin tunah hian an inpeih tawh viau a ni.
He Nghakuai chiah runpui neih turah hian Sialsuk Jt. YMA te chuan kalphung tlem an ruahman a; Registration ti duh tan mi pakhat tan Rs. 100/- fee pek tur a ni ang a, fee hi Online hmanga pek theih tura ruahman a niin a hmuna pek chawp theih tura ruahman bawk a ni. Online hmanga pe te hi darkar chanve chhung nghakuai chiah hun pawhsei sak an ni dawn nia hriat a ni nghe nghe. Nghakuai chiah hunchhung hi darkar khat a ni ang a, chumi chhunga sangha an man zawng zawng chu a man tute’n an nei vek thei ang. Darkar khat chhung baka an la chiah zel duh a nih chuan darkar chanve a cheng sawm nga (50/-) zel pek belhin peih chen chen a chiah theih dawn bawk a ni. Mahni nghakuai neih ang ang thawhchhuahpui tur a ni ang a, a chaw chah pawh mahnia ngaihtuah chawp tur a ni bawk ang. Heta sangha mante hi a hmunah ei tura buatsaih nghal theih a ni ang a, khaw dang tana hawn duh tan pawh sangha uih lohna turin vur chhawp a ni dawn bawk a ni. Heng zawng hi dan leh dun awm chu a ni deuh mai a, a dang chu mahni chhia leh tha hriatna hman tawh mai tur a ni ang.
Kan hriat theuh angin Sialsuk hi khaw upa tak ni tawhin kum 150 vel a ni tawh hial a, hla phuah thiam Laltanpuia pianna leh seilenna khua a ni. Thangthar tam tak tan chuan Laltanpuia hi a hriat loh theih dawn avangin tlemtein han sawi thui hlek ila; vawiin thlenga la chuai lo zaithiam Vanlalhlana’n
Aw, Sialkhawpui ka pianna hmun
Ka seilenna tlang liai luai.
Turnipui lenkawl eng ruai hnuaiah hian ka kawi vel a,
Zaleng an tam ka cho rual si loh sumtualan,
Chantawk hmeldi ka vai lung reng a awi thei lo
A tih vawng vawng hla phuahtu ngei kha a ni. A hla dang sawi tawh lo pawh ni ila hemi hla pakhat chauh vang pawh hian Laltanpuia hi zofate hian kan hrereng tawh ang. Tin, Zoram khawvel hmun danga awm ve lo ‘AWMHAR CHAMPION’ pawh hi kan sawi lai mek Sialsuk khuaah chauh hian a sin a awm ni. Vawiin thlengin Awmhar Champion hi an la awm rengin a bik takin khawhar ni khuate hian zai an vawr thin a ni.
Sialsuk Jt. YMA te buatsaih Nghakuai Chiah Runpui mawlh hi thil chhinchhiah tlak ni dawnin a hriat a, a buatsaihtute hlawkna tur lam chu hre lem lo mah ila a boruak nawm tur zia mawlh si sawi tham a awm dawnin a lang. Mahni ngeia sangha han man nawm zia hi tun hnai lawkah khan Muallianpuiah ka lo hre tawh a, ka vawikhat len dennaah sangha ka han man kha ka theihnghilh tawh hian ka ring lo. Tunah Sialsuk khua chuan an humhalh that em em Sialsuk Tuikhuah ami ngei mai nghakuai hmanga man theih turin an han buatsaih hi hmun hla tak atang pawha pan vang vang chi a ni. CoviD hripui len hma khan sangha hi an manin chumi hnuah chuan vawiin thlengin an la man leh miah lo a, nimahsela sangha chi chu an dah reng thoin eng zata tam nge awm tih hriat theih ni chiah lo mahsela sangha hi hmuhnawm tham a awm a ni. Phai atanga sangha kan lakluh lian tak tak ang tiat hi an nih hlawm tawh avangin Sialsuk Jt. YMA te hian fee tlemte chauh la a hetianga man an han phal ta mai hi midang tan malsawmna a ni ngei mai le.
Le, tichuan nghakuai chiah mai tawh turin han suangtuah chhin mah teh, sangha lian tak tak a rawn leng noh noh ang a, nang chuan a chaw chah nen nghakuai hrui chu nghet takin ilo vuan ang a, sangha chuan a rawn hel that that ang a, a awh veleha i han khaichhuak vel tur kha a hlimawm dawn a sin. Dam chhunga nghakuai chiah lo tluan tur ang hialin sangha kan han khai chhuak nawlh nawlh mai tur chu ha hipa sawi tham a ni ngeiin a rinawm. Chu mai bakah chuan mahni chauha kalna chi pawh niin a hriat loh a, nupui fanau nena kal a nuam lehzual ngei ang.
Chhungkaw eikhawp tur chu man a harin a rinawm loh a, lo man har deuh pawh nisela a boruak a nawm dawn hrim hrim avangin a kal tan inchhirna tur a awm kher loh turah ngai ang. Sialsuk tlangah duh thalin i lengkual thei dawn a, Sialsuk tlang bul lawka In hlui hmel tawh tak kha kum 1905 vela sak tawh Sialsuk Inspection Bungalow (IB) niin, a kiang lawkah pawh IB Kitchen a awm kha. Kum 1918-a sak Doctor’s Quarter te leh Dispensary building-te hi Sialsuk hmun bawk hian a awm a. Sialsuk hmun bawka Compounder’s Quarter pawh kum 1918 kuma sak a ni. Thil hlui ngaina mi i nih phei chuan i ngaihhlut ve ngei a rinawm.
Nghakuai chiah runpui hunah hian khawi atang pawha kal an remti a, eng mi tan pawh hmun a awm tura ngaih a ni. Zu rui mi tan erawh awm a nuam chiah loin a rinawm a, hnawksak zawnga che tan phei chuan a hrehawm viau mai thei. Mizo i nih a, mi pangngai i nih bawk chuan i tan kal a rem lohna engmah a awm lo a, kal turin inbuatsaih tawp la a pawi kher lo ang. Amaherawhchu zanriah kher duh tan chuan mahnia riahna tur ngaihtuah chawp a ngai ang a, Puan In kaih chawp tur (Tent) i neih phei chuan Dil kiang hnaih lawk lawkah pawh riahna buatsaih theih mai tura ngaih a ni. Sialsuk Tlangah phei chuan a rem viau a, boruak pawh a fresh duh viau bawkin a rinawm. Ei leh in lamah chuan lungngaihna tur engmah a awm lo a, Hotel a awmin hnianghnar taka ei tur a awm reng a, YMA lam pawhin an buatsaih dawn bawk a ni. Kum upa lam tan pawh nuam tak tur a ni a, hetiang hi kum dangah phei chuan buatsaih leh a har mai thei e.
Sialsuk khawchhung mite tan tak pawh hian a nawn dawn mai bakah a hlawk dawnin a hriat. Lang-a kal tam tak awm mahsela riak ngeia kal hi chhiar tham tak an awm tho a rinawm a, chung mite chuan mahnia inbawl chawp ai chuan midang buatsaih sa ei mai chu alo awlsam dawn avangin leh a man a to lem loh bawk avangin Sialsuk khaw mite tan hian sum hmuhna tha tak a ni thei dawnin a hriat. Hotel chu kawngpui kama awm a nih avangin pan deuh hlek alo ngai ve bawk si a, a hmuna ei tur a awm mai chuan a awlsam zawk ngei pawhin a rinawm.
Le, Sialsuka Nghakuai Chiah Runpui-a tel turin han inbuatsaih tan rawh le..