China-ah chuan Covid a darh zel loh nana inkhuahkhirhna khauh tak sorkarin a kalpui duh loh lantirna thawm a lian mek zel a, tun hnaia Urumqi-a apartment block-a kangmei chhuaka mi 10 zet an thih hnuah phei chuan lungawi lo an tam zual hle.
Shanghai khawpuiah chuan mi sang tal pungkhawmin in kanga thite hriat rengna hun leh inkhuahkhirh duh lohna an lantir a. An zinga tam tak chuan President Xi Jinping-a bang turin an au rual.
Inrinnia lungawi lohna lantirnaah hian mi pathum vel chu police car-ah hnawh luh an ni.
Kangmei chhuakah khan inkharkhip tlat a nih avangin thihna a thleng niin mi tam tak chuan an ngai.
Chinese thuneitute erawh chuan chu chu thihna thlen chhan a nih loh thu an sawi ve thung a; Urumqi-a thuneitute pawhin Zirtawpni zan tlai tawh takah khan ngaihdam dilna tichhuakin inkhuahkhirhna kalpui mek pawh a tahtawl zela thlahdul a nih tur thu an sawi.
China-a khawpui lian ber leh khawvel huam pawha sumdawnna hmunpui, Shanghai-ah lungawi lohna lantirnaah hian mi thenkhat chuan bati chhiin thenkhatin in kanga thite hriat reng nan pangpar an dah bawk.
Hetih lai hian mi thenkhat chu ‘Xi Jinping, bâng rawh se’ tih leh ‘Communist party, bâng rawh se’ tia an au thawm hriat tur a awm a. Banner var, engmah inziak lo keng an awm bawk.
Hetianga thil phutna lantir hi China-a thil thleng ngai lo tak a ni a; sorkar leh president sawisel hi hremna na tak tawrh theihna a ni.
Lungawi loh lantirnaa tel ve ngei pakhat pawhin kawtthlera mi an pungkhawm ta mai chu mak a tih thu BBC hnenah a sawi a, China-ah heti taka lian thama duh lohna leh lungawi lohna lantir a vawi khat hriatna a nih thu a sawi.
Inkharkhipna hnuaia awm chu ‘a hrehawm, a thinrimin beisei a nei lo’ nia sawiin a nu cancer enkawl lai pawh a kan thei lo tih a sawi.
Mipuite pun khawmnaah hian tharum thawhna tenau pawh a thleng a. Mipui zinga pakhat chuan Associated Press news agency hnenah a thian pakhat chu police-in an vua a, mi dang pahnih pawh hmarcha dipin an phuh tih a sawi.
Mipui lungawi lo hi Inrinni zan thleng inhawr khawm mah se Pathianni tukah erawh chuan boruak a pangngai hle a, police tam tak dah belh an nih vanga private security guard leh thawmhnaw pangngai inbela khawlai leng police officer an awm teuh bawk.
Hetih lai hian online-a thlalak leh video thehdarhah chuan zirlaiten Urumqi-a kangmei chhuaka thihna thleng duh lohna chu Beijing leh Nanjing-a university-ah an lantir tih a lang.
Ram khawpui bera Tsinghua University-a lungawi loh lantirhnaah hian mi za tel an tel tih zirlai pakhat chuan AFP news agency a hrilh.
Zirlaite hian lehkhapuan, engmah inziak lo an lek chhuak a, hei hi Chinese censorship an duh lohna an lantirna a ni a; zalenna leh mipui rorelna an duh thu an aupui bawk.
China-ah hian internet-a lang tur chin leh chin loh thliar a tam avangin video thehdarhte hi a tak ngei a ni em tih finfiah a harsa thin hle a; mahse, tun tuma thil thleng bikah hi chuan sorkar leh a hruaitu lakah mipui an lungawi lo hle tih erawh a hriat.