Khawvel ram tam zawkin hripui avanga inkhuahkhirhna an hmante an hlih tawh laiin China-ah hian Xi-a’n zero-COVID policy a kalpui chu an la hmang reng a; mahse, hei hian variant thar piang zel tur leh darh zel tur a dang a, hripui umbo tuma an beihna a ni.
Hetih lai mek hian khawvel pumah hri kai hmuh an tlem mek tawh laiin China-ah hian ni khata kai hmuh tam ber ni tawngin mi 40,000 chuangte hmuh chhuah a ni tih Thawhtannia thuneituten an tar lanah a lang.
Beijing erawh chuan an policy hman mek chu nunna chhanna a nih thu leh damdawi in indaih lohna nasa tak thleng thei venna a nih thu an sawi a; mahse, kumin kumtir lama an khawpui lian ber leh khawvel huap sumdawnna khawpui, Shanghai-a cheng mi maktaduai 25 chuang zette rei tak tak an inkharkhip chuan mipui a tithinrimin mangang tak tak an tam hman hle.
Thawhtanni khan Global Times chanchinbu chuan National Health Commission-in hmun hrang hrangah tual chhung thuneitute pui turin officer-te an tirh thu a tar lang a. Heng mite hian ‘an harsatna tawh an enpui’ ang a, ‘hlawm khata thil kalpui vek’ thin a tul dan leh tul loh dan te, ‘hri leng beihna kawng dangah’ an pui dawn tih a tar lang.
Khawchhak lama Hefei khawpuiah chuan thuneitute chuan ‘tih loh tur; chi 16 an tichhuak a, heng zingah hian khung hrana awm mekte awmna khar (seal) loh turin an ti a; ram lailia Zhengzhou-ah pawh thuneitute chuan ‘ina awm tura tihna’ chu damdawia inenkawl tura chhuah te, rikrum te, chhanchhuah leh eng emaw hlauhawm laka tlan chhuah te a huam lo tih an sawi.
Mipui lungawi lohna intanna, Urumqi-a Ningania thil thlenna kha ni 100 vel zet mi maktaduai li chuang pawn chhuak thei lova an awmna hmun a ni a. Inkharkhip an nih avangin kangmei a chhuah khan a chhunga chengte an tlanchhuak thei lo va, chhanchhuah hna pawh a muan phah bawk nia sawi a ni.
Heti taka China-a mipui lungawi lohna hi a term thum nana Communist Party hruaitu, Xi-a a nih leh tan atanga thla khat chuang awrha thleng a ni.
“Thil thleng mek hi party tan chhan let ngei ngai thil a ni,” tiin Yale University-a political science assistant professor Dan Mattingly chuan a sawi.
Tuna thil thleng mek hi kum 1989-a mipui lungawi lohna thleng, Tiananmen Square-a tharum nena sipaiten mipui an hmachhawn lakah kha chuan a la nep hle niin Mattingly-a chuan a sawi bawk.
President Xi-a hian China-a thiltithei ber ber dang thlawpna a neih bakah sipaite a thunun vek a, a thuneihna atanga paih thla tur chuan ‘risk’ lak san a ngai hle dawn niin a sawi.
Urumqi-a chhiatna thleng hian China mipuite hnenah huaisenna a thlen niin Young chuan a sawi bawk.