Aizawl: School Education Minister Lalchhandama Ralte-in nimin khan Govt. Saiphai High School building thar leh HSLC Examination Centre thar a hawng.
Lalchhandama Ralte chuan Govt. Saiphai High School-in building thar leh HSLC Examination Centre atana puan thar an ni ta chu lawmawm a tih thu sawiin, school building thar hawn a ni leh examination centre thar an neih tak avangin khawtlang mipui, zirtirtu leh zirlaite-ah nghawng tha zawk neiin result tha leh duhawm hring chhuak se a duh thu a sawi.
Mizoram sorkarin education hmasawnna atana theihtawp chhuah thu sawi zawmin, education quality vawn nun nana hripui leng karah offline exam an buatsaih thu a sawi a, hun harsat avanga hna lak a harsat chung pawhin zirna hmasawnna atan hna 2,800 dawn lai lak a ni tawh a, Mizoram sorkarin zirna a ngai pawimawha priority a pek avangin state matching share pawh a tum thei zel tih a sawi a ni.
Serlui bialtu MLA Lalrinsanga Ralte pawhin thu sawiin MNF sorkar hnuaia sorkar enkawl zirna inten hma a sawn zel chu ropui a tih thu a sawi a. Election laia a lo intiam angin Saiphai Community Hall chu sak that a nih tur thu leh a tul ang zela sorkar atanga ngaihtuah zel a nih tur thu sawiin, Forest Rest House pawh sak thuai a nih tur thu a sawi.
Govt. Saiphai High School building thar hi a a dung 24.74 m, avang 8.52m leh 13.1m-a sang a ni a, room pakua a awm a ni.