Aizawl: Maudarh khuaa quarry chimna hmunhmate en fiahin nimin tuk khan Commerce & Industries Minister Dr R Lalthangliana’n a tlawh a, hmalak mek a nih dante a sawi.
Dr R Lalthangliana hian Maudarh quarry chu Mizoram chhim lam kawng siam mek atana lung tha lakna hmun a ni tih sorkarin a hriatpui thu a sawi a. Ram leilung mila fimkhur zawka hnathawh a nih theih nan Geology & Mining department mi thiamte thurawn angin hmalakna kalpui a nih tur thu a sawi a. Chhiat tawhna hmun zir chiangtu geologist-te zirchianna pawh sorkarah theh luh a nih tawh thu leh hmalak zel dan tur chipchiar zawka enfiah turin director, geology & mining hoin thawktute an kal leh tur thu pawh a sawi.
Quarry hi March 5, 2020 khan C. Lalremruata s/o C. Lalneihthanga, Leite hminga permit pek a ni a, NHIDCL hnuaia contractor ABCI Infra Pvt Ltd NH-54 166.00 km to 208 km (Package 4) siamtu nen inremna siamin August 31, 2020 thleng a nung a, an dil angin mining permit hi July 31, 2023 thleng pawhsei a ni a. Tunah hian license hi November 17, 2022 atang khan chawlh lailawktir a ni rih.
November 14, 2022 tlai lam quarry hi chimin ABCI Infra Pvt Ltd hnuaia thawk, GP Project leh ABCI Infra Pvt Ltd hnathawktu mi 12 chu a delh a. Tunah hian mitthi ruang la hmuh loh pakhat, Jahidul Islam (27) s/o Samsul Haque, Assam zawn hna la chhunzawm zel a ni.