Meghalaya sorkar chuan Assam nena an inrina hrula hmun derthawng laiah border outpost tam zawk an siam belh dawn tih a puang.
State sorkar hian an state chhung hmun thenkhata chawlhkar khat chhung internet a tihthih chu a titawp ta bawk.
Heng thutlukna hi Chief Minister Conrad K Sangma kaihhruaia all-party meeting neiha an siam a ni.
Thutkhawmah hian November 22-a Mukroh khuaa Assam Police-te silai hmeh puaha thite zahna hlan nan minute khat ngawi rengin an ding.
Meghalaya-ah hian ramria buaina a chhuah hnu ni li lai boruak dang a awm loh hnuah Thawhtanni zan khan Shillong tlak lam, Mawbah-ah petrol bomb tihpuah a ni.
CCTV camera atanga a lan dan chuan mipa pahnihin bomb hi Shillong-a Bengali Para vengah Paritosh Das-a chenna inah an vawm puak a ni.
Thuthar lakhawmtute hnenah Sangma chuan Meghalaya Democratic Alliance (MDA) sorkar chuan ramri hrula chengte himna turin a tul ang zawng zawng a ti zel tih a sawi a. Thil thleng chhui turin Justice T Vaiphei kaihhruai judicial enquiry an din tih a sawi bawk.
Assam-Meghalaya ramri-ah hian kar hmasa Thawhlehni zan, Nilaini zing lam khan dan lova thing phur ni ngeia hriat truck chu Assam forest guard-ten an man a, buaina a chhuak zui.
Forest guard telin mi paruk kah hlum an ni a. Meghalaya chuan Assam Police leh forest guard-te hian ‘an state dai lutin silai an hmet puak’ niin an puh.
Assam thuneitute thung chuan truck hi West Karbi Anglong district, Assam-ah forest department team-in an man zawk a, Meghalaya atanga thawk chhuak mipuiin forest guard leh Assam atanga police-te hi an bawh buai ta niin an sawi a. Mipui thunun nan silai hmeh puah a ni ta tih an sawi bawk.