Aizawl: Chief Minister Zoramthanga chuan nimin khan Mamit tlawhin Circuit House leh kum 100 awmna damdawi in bakah District Sports Complex siam hmalakna te leh Mamit Multipurpose Indoor Stadium-te a enfiah.
Mamit khaw changtlun zelna tur atana hmalakna hna thawhte chu fakawm tih sawiin chief minister hian belhchian dawl tak turin thawktuten uluk taka an sak a beisei thu a sawi.
Heng hmasawnna ruhrel hrang hrangte hi khawtlang leh a bik takin thalaite hmasawnna tur atana din a nih angin, mipui pawhin a tir atanga neitu rilru pu zel se a duh tih a sawi.
Chief minister hi Sports & Youth Services Minister Robert Romawia Royte leh Mamit bialtu MLA, Road & Infrastructure Development Board vice-chairman ni bawk, Er. H. Lalzirliana ten an tawiawm.
Mamit Circuit House hi June 13, 2019 atang khan sak tan niin, July 16, 2021 khan zawh a ni a. Rs. nuai 273.34 senga sak a ni a, ram 293.38 metre biala zau a awh a, chhawng thum awmin, dormitory bakah riahna hi a vaiin pakua a awm.
Sports & Youth Services Department kaltlangin PMJVK atanga sum hmuhin District Sports Complex din hna thawh mek a ni a. A hmunpui turm Bawngva bakah DC ground-ah futsal ground leh tennis court pahnih siam a ni dawn a, multipurpose hall sak a ni bawk.
Heng bakah SYS hnuaia Mamit Multipurpose Indoor Stadium sak mek chu a enfiah bawk a. Hei hi SEDP atanga Rs. baibelchhe 4.62 leh Special Assistance to States for Capital Investment (SASCI) atanga Rs. vaibelchhe 7.88 hmuh, belhkhawmin Rs. vaibelchhe 12.50 hmanga sak a ni.
Kum 100 awmna damdawi in sak mek hi Power Finance Corporation atanga CSR kaltlanga Rs. vaibelchhe 17.93 dawn hmanga sak a ni.