Aizawl: MPCC President Lalsawta chuan kut fai leh thinlung thianghlim takin nakkum MLA inthlan an hmachhawn dawn niin a sawi.
Laila Hall, College Veng, Siaha-ah nimin khan Mara District Congress Committee (MDCC) General Assembly vawi 22-na neih a ni a. Thusawiin Lalsawta hian, “Kan ramah neutral tam tak, Kohhran mi leh party mi tam tak kan awm a. Chung chuan nakkum inthlan kan thlir. Nakkum inthlan turah Congress party chuan hautak lo takin, ram tana hnathawk thei tur, mi tling ngei tur candidate kan chhawp chhuak dawn, an retheih avangin kan hnawl ngawt dawn lo,” a ti.
Party dangten inthlana chak zawk nih tumin pawisa cheng nuai zahnih zathum rinchhan dawn mah se Congress party chuan kut fai leh thinlung thianghlim takin he inthlan hi an hmachhawn dawn a, pawisa chakna hi tihhlum an tum tih a sawi a. “Chutiang a thlen theihna tur leh ram leh hnam tana hna tha an thawh theih nan kan MLA candidate-te tihautak lo turin ka ngen a ni,” Lalsawta hian a ti bawk.
MADC chungchang sawiin MPCC president hian, “BJP MDC thenkhat leh MNF MDC thenkhat, an thawhpuiten an hriatpui nge hriatpui loh pawh hriat lohten Mara ram tana hnathawka kan buai laiin min barakhaih thut mai a, kan duh ang chu a ni lo. He thil thlengah hian Congress chu kan buai lo,” tiin, Congress MDC-te a hma angin nghet takin an la ding reng tih a sawi.
Lalsawta hian Mara District Council sorkara thil thlengah Congress MDC palite rinawm tak leh kut fai taka an awm chu Congress nihphung tur dik a nih thu a sawi a. Mara mipuite, Lai mipuite leh Chakma mipuite hi Congress sorkarah chuan dinhmun duhawm leh tha zawk an ngaihtuahsak dawn niin a sawi.
“Congress chawrno tha leh mek hi Mizoram tan, kan ram tan a ni. Rinawm tak leh dik takin awm ila, tun 2022 Krismas bak hi MNF sorkar hnuaiah kan hmang tawh dawn lo,” tiin Lalsawta hian, Congress party zawm thartute pawh Congress party tan mai ni lo, ram leh hnam tana rinawm taka hna tha thawk turin a sawm tih a sawi bawk.
TT Vakhu, Vice President, MDCC kaihhruai inkhawmah hian MPCC Vice President Lal Thanzara, S. Hiato, President, MDCC, Palak bialtu MLA KT Rokhaw, R. Lalrinawma GS MPCC leh H. Malvina, CEM MADC-ten thu an sawi bawk.