Aizawl: Hualngoram People’s Organisation (HPO)-in Central YMA hnuaia ruihhlo dotu, Central Anti Drugs Squad (CADS) hnenah ruihhlo do nan Rs. nuai 1 an hlan.
Tanpuina sum inhlanna puala hun an hman kaihruaitu, Central YMA President R Lalngheta chuan CADS member-ten chhun zan zawmin ruihhlo do hna ngawrh takin an thawk mek tih a sawi a, an hmalaknaah hian mamawh tam tak an nei a, chung phuhruk tura mi inphalten tanpuina an pe thin chu lawmawm an tih thu a sawi.
HPO hruaitute chuan ruihhlo hmanga sum dawng thin mi dik lote chu Mizo mipui leh Zofate hmelma lian tak an ni tih an pawm a, Central YMA-in ruihhlo do a kalpui mek chu thlawpin a theih ang angin an thawh pui zel dawn tih an sawi.
Central YMA hnuaia ruihhlo dotu, CADS hi September 9 atang khan din thar leh a ni a, tunah hian batch hnihna kalpui leh mek a ni.
CADS 2nd batch-te hian November 18 atanga 28, ni 12 chhungin heroin hawng 22 leh tictac bur 178 bakah ruihhlo dang thahnem tak an man leh tawh a, hemi kaihnawihah hian mi 61 an man a, chung mite chu police leh excise kuta an hlan bakah ruihhlo ngai enkawlna hmunah te an dah a ni.