Nightingale Care Services (Home Healthcare) – in lama damlo, tar chaklo leh enkawl ngai te enkawltu tura training chu Jay Jay Training & Placement Solutions, Falkland Veng, Aizawlah nimin khan Larsap Hari Babu Kambhampati-a’n a hawng.
Larsap chuan Jay Jay TPS-in kum 10 chhunga hma a lo lak tawhnaah thalai tam takin ram chhungah leh ram pawnah hna an hmuh phah avanga lawmawm a tih thu a sawi a. Helam hawi zawng hian LESDE leh a training partner dang te pawhin skill training course dang te pawh siam belh zel se, thalai tam takin eizawnna an neih phah dawn tih a sawi.
Sorkar hnathawh tur chu tlem te a nih thu larsap chuan sawiin, “kumtin thalai lehkhathiam an awm belh zel a, eizawnna kawng dapin hnathawh tur an mamawh” a ti a. Mizoramah ringawt hnathawh tur zawng lova state pawn leh ram pawn lama hnathawh tur tam tak awm mek te thalai ten an ngaihven a hun tawh tih a sawi.
Rampawna hnath- awh tur zawngte hnena hna hmuhsak thei nia insawi lemchang tam tam tak an awm tih erawh hriat a pawimawh thu Larsap chuan a sawi a. Fake agency chu awihawm taka an insawi thin avangin mi tam takin bum tawkin harsatna an tawh phah tawh tih ssawiin, hna zawng mek te chu Fake placement agency te thangkamah an awh lohna turin hna pe thei nia insawi nazawng te ring nghal mai lova zirchiang hmasa thin turin a chah.
Larsap chuan sorkarin a pawmpui agency ngei pan a that thu sawiin, Mizoram ah pawh rampawna hnathawh tur zawnsak thei awm chhun leh Ministry of External Affairs-in license a pek Jay Jay TPS Aizawlah a awm chu lawmawm a tih thu a sawi a. Jay Jay TPS hotute pawh theihtawp chhuah chhunzawma, skill training dang te pawh mamawh dan mil zela siam belh turin a chah bawk.
Sorkar thuchhuah in a tarlan danin Jay Jay TPs hi kum 2011 a din niin, mi 600 chuangin training an zo tawh a. Training chhuak tawh zinga mi 400 vel chu hna an hmuhsak tawh.
Jay Jay TPS-ah hian zirlai 140 (hostel- ler) awmin, Nightingale Care Services (Home Healthcare), thla thum chhung training hi North Eastern Council (NEC) hnuaia hmalakna a ni. He training course hi Indian Institute of Entrepreneurship (IIE) duan niin, certificate pawh IEE pek a nih thu sorkar thuchhuah chuan a tarlang bawk.