Aizawl : Khawzawl-ah nimin khan bawlhhlawh sakhat tawihthei sawngbawl dan inzirtirna ‘Solid waste management training’ Khawzawl khawpui chhung VC te tan buatsaih a ni a. Khawzawl Bawrhsap C.C. Lalchhuangkima’n telpuiin, kumin chhungin BDO Khawzawl hmalaknain Khawzawl town area hmun 700 chuangah bawlhhlawh sawngbawlna khur siam a nih tawh thu a sawi.
Khawzawl Bawrhsap chuan tawihthei bawlhhlawh paihna hmunte chu tha taka enkawl tur chuan bawlhhlawhte leithaa chantir zel a tul tur thu a sawi a. “Bawlhhlawhte chu thil tangkai leh hlu zawk ‘waste to wealth-ah’ kan chantir thei zel dawn a, thil hlu tak kan nei thei dawn a ni” tiin, “Khawzawlah leitha indaihlohna a nasa em em a, chumi ti ziaawm tur chuan a tangkai hle dawn a ni”, a ti bawk.
He hunah Khawzawl town area atangin VC member an kal kim a. R. Vanlalduati, SMS (Soil Science), KVK Khawzawl District-in kalkhawmte training a pe a. VC-te chuan an veng mipuite hnenah training an pe chhawng ve leh dawn a ni.