Kumin World Cup a inkhel hmuhnawm ber zinga tel ngei turah Ghana in South Korea an hneh a. Round of 16 an luhna atana pawimawh tak result ni turin 3-2 in an chak.
Education City Stadium a inkhelah African team in first half a minute 10 chhungin goal hnih an khung a. Southampton defender Mohammed Salisu leh Ajax midfielder Mohammed Kudus ten goal an khung.
Halftime-ah Ghana fans thawm ring viau mahse second half-ah South Korea an zam lo. Huaisen leh taima taka khelin an tan rualna an chakpui.
Tualchhung league a an top scorer Cho Gue-sung a inlar. Minute 58-naah an goal khatna a tauh lut a, minute 61-naah an si phurh sutna goal a tauh lut mawi.
Ghana tan erawh che tha tak Kudus bawk danglamna siamtu a ni a. First half-ah Jordan Ayew cross tauh lut tawhtu hian second half-ah South Korea vel turin an chakna goal a khung.
South Korea in huntawp dawn thlengin goal khung theihna remchang an insiam a, mahse minute 10 pek belh thlengin a tawp thleng goal an khung thei lo.
An result avangin tlak an hnaih tawh a. Huntawp hamrik a rik rualin player-te rilru na in chhuatah an tlu. Hetihlai hian an manager Paulo Bento chu referee Anthony Taylor-a’n huntawp hma a corner a pet tir lo chu a sawisel avangin a hnawtchhuak.
Inkhel zawhah a assistant coach Sergio Costa chuan, “Corner pet tur kan ni a, mahse referee in min pet tir lo. Kha vang khan Paulo kha a lungawi lo. A bul hnaia awm ka ni a, referee lakah thil mawi lo engmah a sawi lo. Thutlukna lai tak ni lova ngaitu in a sawiselna mai chauh a ni.” tiin a sawi zui.
South Korea hian Portugal hmachhawn leh tur an ni a, hei vang hian Ghana laka point hmuh loh an tan a pawi. Lehlamah Ghana in Uruguay an hmachhawn leh dawn a. An chak chuan round of 16 an tling chiang dawn a, draw result pawh an tan a that tawk theihna a awm.