Ferrari team principal Mattia Binotto chuan kumtawpah Italian team atang a nihna a chhuahsan dawn.
Thawhlehni khan Ferrari in kum 53 mi hian an team a chhuahsan tur thu hi an sawi chiang a. A thlaktu tur an ngaihven nghal thu an sawi.
Kum 1995 a Ferrari zawmtu Binotto chuan, “Thil zawng zawng kan duhthusam ang a ni thlap lo chungin Ferrari a hna ka thawhna chu tihtawp a hun niin ka hria.”
“Thutlukna siam harsa tak a ni chungin ka tan bung thar kai a ke ka pen hun chiah niin ka hria.” tiin a sawi.
Binotto hian Ferrari-ah hain engineer a lutin an engine siamna lamah bul a tan a. Nasa taka intlansiakna leh company pum a than chhoh laiin engine department lamah a hotu niin a hnuah an F1 team technical director ni zuiin kum 2019 khan team principal-ah a kaisang.
Ferrari hian a hnuaiah kawng hrang hrangin hmasawnna nei mahse tun season liamta khan an car chu a rintlak tawk loh leh thin avang leh team in tihsual an neih thin te chuan a dinhmun hi a nghawng niin a lang.
Engtin zel?
Kar hnih kalta khan Ferrari chuan social media kaltlangin Binotto chu thlak an tum nia thuthang awm chu a dik lo niin an lo sawi tawh a. Hetihlai vel atang hian Alfa Romeo team principal Frederic Vasseur nen sawizawm an ni.
Abu Dhabi a intlansiak an zawh hnuah Binotto hian chhuah tumna a nei lo niin a sawi a. Ferrari chairman John Elkann nen an titi dun tawh a, hma an sawn theihna tura kal dan tur tha an ngaihtuah tih a lo sawi tawh.
Nimahsela heti chung hian chhuak tura ngaih a ni reng thova. Italian team in a chungah rinna tak tak an nghat tawh lo niin tam takin an ngai tawh.