Senegal defender rinrawl Kalidou Koulibaly chuan laklawh awm miah lovin remchang a hmuhah goal a khung a. Senegal tan hnehna channa goal niin World Cup round of 16 an lut.
Thawhlehni zana Khalifa International Stadium a Group A inkhel hnuhnungah Senegal in 2-1 in Ecuador an hneh a. Knockout stage inchuhnaah South America ram an tling zo lo.
Hnehna an chan avangin Aliou Cisse pawlte hi Group A-ah pahnihna an ni a. England nen round of 16-ah Pathianni zanah an inkhel ang.
Inkhel a goal lutte hi England a inkhelte vek khung a ni a. Senegal in halftime dawnah Ecuador defender Piero Hincapie penalty chawi chu Watford forward Ismaila Sarr chuan goal-ah khungin hma an hruai.
Hei hi club liante ngaihven hlawh tak Brighton midfielder Moises Caicedo chuan second half-ah a sut a. Tling thei dinhmun a Ecuador an din zawk chhung a rei lo. Chelsea defender Koulibaly-a’n an chakna goal a khung zui.
Tlin nan a point khat chauh mamawh Ecuador in Senegal hmaah nidang pha lova an khelh an tuar a. Africa champion lai hian an hnehna hi kum 2002 World Cup a France laka an chakna goal khungtu, kum hnih kalta a thi ta Papa Bouba Diop tan an hlan.
Dutch an sang ber
Group A inkhel dangah Netherlands tan forward che tha tak Cody Gakpo chuan goal a khung leh a. Qatar lakah 2-0 a chakin group hmahruaitu an ni.
Qatar in tun World Cup-ah an elpuite an la pha lo hle tih a lang a. World Cup chanchin a a thlengtu ram in point hmu miah lova group stage an chhuahsan hmasak ber tum a thleng.
PSV Eindhoven winger Gakpo hian minute 26-naah goal khungin match thumah goal a khung vek a. Second half tan tirah Frenkie de Jong chuan an goal hnihna a khung a. USA nen round of 16-ah an inkhel ang.