Senior Women’s T20 Trophy final-ah Mizo nulaten run 10-a Bihar hneh lovin nomawi an la thei ta lo va, champion hian season tharah a thiam rual inelna, Elite an khel zui ang.
Nilainia Nagaland Cricket Stadium, Sovima, Nagaland-a final khelhah Mizoram tan West Bengal atanga lak luh (guest player) Indrani Roy-i’n run 35 thawk chhuakin opener Ankita Bhongade-i’n run 22 a vaw chhuak bawk a, batter dangten an puih that tawk loh avangin over 20 chhungin mi pakua thiin run 106 chauh an tlin thei a, run 10-in Bihari nulate run siam zat an phak lo.
Bihar hi thum vawrah chakin vuak hmasak an thlang a, bul pawh an tan chhe lem lo va. Opener pahnihin an thih hnuah a zuitu, Yashita Singh-i leh Shruti Gupta-i ten run 20 ve ve an thawk chhuak zui a. Mi dangte pawhin ball hmachhawn aia tam run vaw chhuak deuh zelin over 20 chhungin mi pasarih thiin run 116 an tlin.
Mizoram tan Damdiai nula, Lalnunmawii’n over li a vawmah run 25 pein wicket hnih a la a, vawm tha ber niin ZD Lalnunhrili’n over li-ah mi pakhat vawm thiin run 20 a pe a, bowler panga zinga run pe tlem ber a ni.
Champion tuma Bihar run siam an umnaah guest plater pahnih, Roy-i leh Bhongade-i te run thawh bakah Lalrinfeli leh Naik-i ten run 11 ve ve an thawh a, a bak Mizo batter lut zingah run 10 vaw chhuak tling an awm lo.
T20 Trophy-ah hian Mizoram hmeichhe team hian season liam ta khan net run rate-ah Nagaland an phak lovin Plate-ah pathumna an ni a, final an lut pha lo chiah a. Tun season-ah hma sawn hretin final an lut a, nomawi erawh an la ban phak ta lo deuh a ni.
Bihar nen hian group stage-ah inkhel tawhin team panga an tum zinga an hneh loh awm chhun a ni a, kar hmasa Ningani khan run 16-in an hneh lo va. Final-ah insu lehin a hma aia run tlem zawkin an hneh lo leh a ni.
Senior Women’s T20 Trophy hi chi hnih awmah Plate hi a hniam zawk a ni a. Team ruk awmin an inkhelh kual chhuah hnua a sang pahnihin final an khel a, Mizoram hian Bihar chiah hneh lovin pahnihna niin final hi an lut a ni.
Senior team-ah hian Board of Control for Cricket in India (BCCI) danin a phal angin state pawn (guest) player pathum lak theih a ni a. Tun season-ah hian Cricket Association of Mizoram (CAM) chuan West Bengal atangin Roy-i, Mumbai atangin Naik-i leh Maharashtra atangin Bhongade-i te la an ni.
CAM chuan Senior Women’s T20 team chu a vanduai zawkah tang mah se final hial an thlen theih avang leh tournament tha tak an khelh avanga an chhuah thu leh player leh support staff chungah an lawm thu an sawi.