Punjab-a hmeichhiate chu sorkar bus-ah chuan man awm lovin vawiin atang hian an chuang thei tawh dawn.
Chief Minister Amarinder Singh-a kaihhruaia nimina state cabinet thukhawm chuan hmeichhia leh hmeichhe naupang vaibelchhe 1.31 chuangin an chhawr theih tur scheme hi an pawm.
Kum 2011 chhiarpuiah khan Punjab-ah hian mihring vaibelchhe 2.77 (mipa 1,46,39,465 leh hmeichhia 1,31,03,873 an awm).
Vawiin atang chuan hmeichhiate chuan he scheme hi an chhawr nghal thei dawn a. A thlawna an chuan theih tur zingah hian Punjab Roadways Transport Corporation (PRTC), Punjab Roadways Buses (PUNBUS) leh tualchhung sorkarin a tlantir city bus pawh a tel.
Sorkar bus zawng zawngah erawh a thlawnin an chuang thei dawn lo va. AC, Volvo leh HVAC (heating, ventilation leh air conditioning) bus-ah chuan chuan man an chawi a ngai tho.
March thla tirah khan chief minister chuan an state-ah hmeichhiate tan lirthei chuan man awm lova kalpui an tum thu hi a lo sawi tawh.
Chief minister pisa chuan Punjab-a cheng ngei an ni tih lan nan Aadhaar card, voter card leh an cheng a ni tih lanna lehkha tawh phawt chu hmeichhiaten a thlawna bus an chuan theih nan hian pawm a nih dawn thu a sawi.
“Hmeichhia, Punjab sorkar hnathawk chhungte emaw, Chandigarh-a cheng emaw, anmahni ngei, Chandigarh-a chengte pawhin an chhawr thei dawn a, an kum leh an sum lak luh emaw lamin sorkar bus-a a thlawna an chuan theihna hi engmahin a dal dawn lo,” a ti.