Israel hmarchhak lama sakhaw thila pun khawmnaa chhiatna lian tak thlengah mi 44 vel zet an thi.
Mount Meron bulthuta kum tina hman thin, Lag B’Omer festival-a chhiatna thlengah hian mi thahnem takin hliam an tuar bawk.
Prime Minister Benjamin Netanyahu chuan ‘chhiatna lian tak’ tia sawiin, a hmun ngeiah a tlawh tur thu a sawi.
Festival-ah hian Orthodox Jew thahnem tak an tel a, coronavirus hripui a len hnua Israel-a intawh khawmna lian ber a ni.
Israel-ah hian invenna damdawi pek a chaka mi tam zawk pek an nih hnuah inkhuahkhirhna hrang hrangte thlahdul a ni a; mahse, hriselna lama thuneitute chuan Covid-19 darh leh thei reng a nih thu an sawi.
An sawi dan chuan an ram sanaa nimin zing dar 1:00 (India-a zing dar 3:30) velah festival hmanna in rel (structure) a chim niin an sawi.
Police-te chuan step-a mi a tluin mi dang bawhin an inbawh tlu ta teuh va, heta tang hian chhiatna hi a thleng ta niin Haaretz chanchinbu hnenah an sawi.
“Mi an tlu a, an inchil a, chhiatna lian tak a thleng ta a ni,” tiin thil thleng hmutu pakhat chuan chanchinbu hi a hrilh.
Video an thehdarhah chuan chhuahna zim takah mi sang tel hmun him lam pana an tlan chhuak lai a lang.
Police-ten a hmun chhuahsan vek tura an tih hmain aurinna hmangin mipuite chu hmun hima tlanchhe tura hrilh an ni.
“Tumahin hetiang a thlen an ring lo,” tiin a tel ve pakhat chuan Channel 12 TV a hrilh a. “Hlimna chu lusunnain a zui a, eng ropui tak kha thim chhah takin a khuh ta a ni,” a ti.
Ambulance thahnem tak chah luh niin ruangte chu khuhin khawlaiah an tlar a. Helicopter hmangin hliam tuarte chu damdawi in panpui an ni a, sipaiten in rel chim kara mi tang zawn leh chhanchhuah hna an thawk.
Mi 150 velin hliam an tuar niin thuneitute chuan an sawi a, mi 38 chu an na hle niin an sawi.
Thi leh hliam zingah hian naupangte pawh an tel.
Chhiatna thlen hma chhun lamah khan thuneitute chuan coronavirus avanga inkhuahkhirhna kalpui hleih theih lohvin mi an tam tih an sawi.
Police-te hian chhiatna thlen hma hian dan kenkawh lai palzut mi pahnih an man tih an sawi bawk.