MPCC President Lalsawta chuan Congress party-in ram chhe zel tur dinhmuna din an rem tih loh thu leh tu leh fate tana ram tha leh nuam zawk din chu an tum ber a nih thu a sawi.
Nimina South Tuipui Block I Congress Committee huam chhunga unit hruaitute, Mahila leh thalai hruaitute intawhkhawmah thu sawiin Lalsawta hian, dik lo taka pawisa ngah hi phurrit mai a nih thu a sawi a. Sorkar siam leh tlin tuma hmana tih dan tha lo chhawm hi hnualsuat a ngai a, hmana tihdan aia tha zawk, mi dangte leh ram tana thil tha zawk siam hi an tih tum a nih thu sawiin, “Congress party chuan ram chhe zel tur dinhmuna a din kan rem ti lo. Kan tu leh fate tana ram tha leh nuam zawk din hi kan tum ni,” a ti.
Duhthlanna fim tak Pathianin a pek ram mipuiin a hman hi Congress party duh dan a nih thu sawiin Lalsawta hian, “Sum leh pai hmanga mipui lei theiha ngaihna hi Congress chuan kan dodal zel dawn. Pawisa hmanga inleitir hi ram hralhna a ni a. Lal Isua thisen chauha lei kan ni a, candidate leh political party-ten lei theiha an ngai che u a nih chuan i zahawmna humhim tur leh sorkar tha siam tura lo dodal turin ka ngen che u a ni,” a ti a. Kum khat chhung chauh huaisen taka insum hian ram rorelna tha a pe thei a, sum leh pai hmanga inthlem dodal hi Kohhran, MPF, Election Commission te duh dan a nih thu a sawi.
MPCC Vice President Lal Thanzara pawhin Congress party-a haw rûnpui a thleng mek tih sawiin, mi tha tak takin Congress an zawm mek zel a. Ram leh hnam hmasawnna hnathawk tura mi tha an sawmte pawhin an Chief Ministerial Candidate Lalsawta an enin zui tlak leh zui atana an duh a nih avangin an hnar a rin loh thu a sawi.
Lal Thanzara chuan chief minister a lo lan apianga nuih tumna hri leng tih reh hi a tul tih sawiin, “Kamrula te hoin cabinet minister nih theihna chance an neih san em emna party hi Mizoram mipui tan pawm reng chi a ni lo,” a ti a ni.