Azl: MPCC President Lalsawta chuan kum 2023 MLA General Election-a South Tuipui bial Congress party candidate atan Er C Laldintluanga, Hnahthial Model veng a puang.
Nilainia South Tuipui Block pathum Special Meeting neihah Congress president thu sawiin kum 2023 inthlanah Congress party an mal tan dawn lo a, dik leh fel taka an tih chuan Pathianin a pui dawn tih hi an ring ngam tih a sawi a. Congress an sorkar chuan hlemhlet duh mah se, an hlemhle dawn lo a, eiru turin hun remchang an nei dawn lo niin a sawi.
Lalsawta hian, “Thusawi hlimawm leh nuihzatthlak ka sawi thiam lo, ka sawi theih erawh Mizoram damdawi a ni. Sorkar tha siam kan duh avang leh thluaka sum lut laka fihlim kan duh avangin candidate kan puang zawih zawih lo a, kan fimkhur a ni. Chutiang turin South Tuipui bial hmasawnna hnathawk tur leh dikna luipui luantir turin Pu Er. C. Laldintluanga, Hnahthial Model veng hi kan puang a ni,” a ti.
Er C Laldintluanga pawhin thu sawiin, Zoramin harsatna a tawh apiangin a chhanchhuak turin Pathianin Congress party a ruat thin tih sawiin, “Kan rama sorkarna siam tawhte zingah hnathawk tha ber a ni,” a ti bawk.
Kum 2023 MLA General Election-a Congress party candidate tur pathum chu hriat chian theih a ni ta a. November 5, 2022 khan Serchhip biala Congress party candidate ni turin R Vanlaltluanga hming puan a ni tawh a; Thawhlehni khan Siaha bial-a ding turin N Chakhai puang ni tawh bawkin, nimin khan South Tuipui biala ding turin Er. C Laldintluanga puang a ni leh bawk.