Aizawl: Health Minister Dr R. Lalthangliana chuan Thawhlehni khan Guwahati Neurological Research Centre, Dispur, Guwahati tlawhin damdawi in thuneitute nen an inkawm.
Dr R. Lalthangliana hian GNRC hotute hi a ngenna ngai pawimawha Civil Hospital, Aizawla outreach programme an neih avangin lawmthu a hrilh a, Mizoramah neurological-a harsatna awmte laka zirtirna kalpui chhunzawma doctor thenkhatte short course training pe turin a ngen a. GNRC hotute hian kumtharah Mizorama clinic buatsaih an tum thu hrilhin Mizo doctor training peihte tan pawh an inhawn thu an hrilh a ni.
Hemi hnu hian Mizoram House-ah Mizoram sorkar hnuaia empanelment hmu thar, Eye Care Hospital hotute nen an inkawm a. A ngen angin Eye Care Hospital hian kumtharah Mizoramah free clinic buatsaih an tum.
Nimin khan Dr R. Lalthangliana chuan Dr. B. Boruah Cancer Institute (BBCI)-ah High Dependency Unit (Female) hawngin hemi hnu hian khuallian niin Guwahati Mizo Students’ Union silver jubilee a hmanpui.