Aizawl: Mizoram Police buatsaihin nimin khan Assembly conference hall-ah mihring hmanga sumdawnna (human trafficking) chungchang zirho leh sawiho a ni a, khuallian, Home Minister Lalchamliana’n kum 2000 hnu lamah Mizoramah human trafficking thubuai 35 a awm tawh thu a sawi.
Home Minister Lalchamliana chuan, khawvel in a buaipui em em mihring hmanga sumdawnna chu Mizoram ah pawh a hluar chhoh zel thu sawiin, “Kum 2000 hnu lamah Mizoram ah human trafficking thubuai 35-a awm tawh a; hmeichhia 89 leh mipa parukte chhanchhuah tawh niin pawikhawihna-a inhnamhnawih mi 64-te man an ni tawh,” a ti.
Mihring hmanga sumdawn dona kawngah Mizoram Police-te inpekna leh hmalakna chu chhuanawm a tih thu Home minister chuan sawiin, state chhung leh pawn lamah nasa takin chhanchhuah hna an thawk thin tih a sawi.
Lalchamliana chuan, mihring nun tichhe zawnga eizawnna chu a zung atanga phochhuah a, tirem tur chuan Mizoram Police leh pawl hrang hrang thawhhona a pawimawh thu leh a tuartu sawiin, “Chhanchhuah mai piah lamah nunphung pangngai a an nun leh theih nan a chhawmdawl dan thlengin ngaituah a ngai hle,” a ti.
Khualzahawm, Mizoram Police DGP Devesh Chandra Srivastva pawhin thu sawiin, mihring hmanga sumdawnna hi Mizoramah chuan hmeichhia leh naupang chungah a nasa ber a; retheihna leh chhungkaw harsatna vanga tang an tam ber tih a sawi.
DGP chuan mi sualte hian hna tha zawk pek tiamin ram dangah hruaiin an bum ta thin a, placement company leh pawl hrang hrangte nen tangkawpa hmalak a ngaih thu a sawi a; tun hnaia Myanmar leh Bangladesh rambuai vanga raltlante chu chhawmdawl an ngai lehzual a, ven an ngai hle tih a sawi bawk.
State Level Conference on Anti-Human Trafficking-ah hian kohhran leh tlawmngai pawl hrang hrang aiawhte an tel a, resource person-ten human trafficking dona tur thupui hrang hrang an sawi bakah an sawi bawk.