Ni thum chhung awh tur State Level Training chu BJP Mizoram Pradesh chuan nimin khan an pisa ‘Mipui Run’-ah an tan.
State Level Training ni khatna nimina neihah mi pathumin thupui thlan bik hmangin training neih a ni a. BJP National Training Department atangin Hemant Goswami chuan ‘Integral Humanism’ tih thupui hmanin training a pe a. BJP innghahna lungphum pawimawh hrang hrang te kalkhawmte hnenah hrilhin, BJP chuan retheihna lak atanga khaichhuah hi an thupui leh an hmalakna pawimawh ber a nih thu a sawi.
BJP National Spokesperson leh BJP NE Co-ordinator ni bawk, Dr Sambit Patra pawhin ‘Cultural Nationalism’ leh ‘Modi Government and National Security’ leh ‘North East integration’ tih thupui hmangin zirtirna a pek bakah, PC Lawmkunga, IAS (Retd)-in ‘Achievement of Modi Government & Foreign Policy’ tih hmangin training a pe bawk.
He hun hi BJP Mizoram Training Incharge Delson Notlia-in kaihruaiin, State President Vanlalhmuak, Dr BD Chakma MLA ten central atanga BJP hruaitu lo kalte lawmna thilpek a hlan a. He hunah hian Mizoram district hrang hrang atanga district president leh general secretary te, National Executive Member te, MLA te bakah State Executive Member te telin, member 75 an kal khawm a ni.