NBA team lian leh ngaihven hlawh Los Angeles Lakers chuan a chhe ber pawla bul an tan hnuah insiamrem theih dan an nei tih lantirin hnehna an chang ve leh a. 128-109 in Portland Trail Blazers an hneh.
Ningani zinga Lakers hian tunkara uihawm taka Indiana Pacers an hneh loh hnuah hnehna chang chhunzawm ve lehin tun season-ah a vawi riat nan chauh an chak a. Western Conference-ah 13-na chauh la ni mek mahse tunhnaia an inkhelh dan leh player-te chetthat dan thlirin an tan playoff beiseiawm taka insiamrem theihna kawng a la kua.
Inhliam avanga kar thum dawn a chawlh hnuah LeBron James chuan point 31, assist vawi 8 leh rebound vawi 7 la in a team tan a langsar ber a. Lakers in an tlakchham ‘shooting’ mawhphurhna la in 3 pointer vawi 8 atang vawi 6 a lut.
Anthony Davis chuan point 27 leh rebound 12 la in sawisel a hlawh hnua a chetthat a chhunzawm a. Austin Reaves chuan point 22 a thawh bawk.
Lakers chak nan fourth quarter-ah Davis a pawimawh a, point 14 a thawh a tangkai. Team khelhdan a mil lo tia sawisel Russell Westbrook pawh tunhnaia bench atanga a tangkaina chhunzawmin bench atang point 10 leh assist vawi 4 a nei a. 2nd leh 3rd quarter tawp dawnah 3 points a luh ve ve a tangkai.
Blazers hian a zawna match ruk nan an star player Damian Lillard an chhawr thei lova. Jerami Grant chuan point 27 an tan a score ve thung.