Bawlhhlawh paih chungchangah mipui tawrhna tawp tawh se
Aizawl khawpuiah mihring kan tam tial tial a, chu chuan bawlhhlawh a keng tel tih a hriat theih bawk. Aizawl khawpui bawlhhlawh paih dan phung hi en fel leh chinfel ngai tak a ni. AMC inthlan kan hman zawh taka party hrang hrang auhla lian zinga mi kha a ni tel bawk nen, a lo awm lo lem lo e.
Kan bawlhhlawh paihna hmun lam hian min daih tawh meuh loh avangin Aizawl Solid Waste Management Centre enkawltu, SIPMIU lam chuan bawlhhlawh paihna hmunah hian thla khatah bawlhhlawh metric ton 1,300 vel paih khawm thin a nih laiin hman tangkai leh theih chi leituten an lei zawng zawng chu thla khatah ton 1,000 vel chauh a nih thu an sawi a. Tuna a lei thintute chu Meghalaya-a inbun cement factory-te an nih daih avanga bawlhhlawh tihriral lam chu a chak theih loh thu an sawi bawk a, a enkawltu lam tan pawh a buaithlak viau ang tih a rin theih.
Hetih lai hian mipui lam chu bawlhhlawh paih dan chi hrang hrang zam sak kan ni a, chumi hmang chuan khirh taka bawlhhlawh paih hun bi siamsak kan ni. Mahse, a hmun ngeia tlawhtute hmuhchhuah erawh bawlhhlawhte chu chi hnih chauha paih a ni a, tawih thei leh tawih thei lo! Mipui lam kan tibuai mai mai zawk niin a lang.
AMC mayor pawhin ruahmanna siamin, kalphung fel lo lai siamthat tumin nasa takin hma a la nghal niin a hriat a, mipui lamah tax kan la reng bawk si a nihchuan, a hmuna lo thliar feltu tur man chawiin ruai mai se, mipui lam buaina hi chinfelsak thuai ni hmasa zawk se a fuh ang.
Mayor hian bawlhhlawh paih danah theihtawpa AMC tanpui turin mipui a sawm tawh a, mipui lam hian theihtawp chu kan chhuah reng sa niin a hriat, a hmuna chi hnih chauha kan paih leh reng tho lai hi chuan khawpui chhung vengtina bawlhhlawh min paihtir dan hi chu thlak thei tawh se a duhawm hle.