United States-ah Covid-19 kai an pung thar leh mek a, an ram chuan hrehawm leh natna na zawk a hmabak mek niin mi thiam chuan a sawi a. An rama invenna la la lo tamna zelah hri kai hi an pung.
ABC-a This Week programme-a Pathiannia an kawmnaah Dr Anthony Fauci chuan ‘invenna la la lote zinga darh’ leh mek hian ni sarih bi zela US-a COVID-19 kai zat an chawhrual thin chu nasa takin a tisang tih a sawi.
COVID-19 vaccine hi US pumah pek kalpui niin puitling 60.4% chuan a bikimin an la tawh niin US Centers for Disease Control & Prevention (CDC) chuan a sawi.
Hetih lai hian mi tam tak chuan chhan hrang hrang avangin an la duh lo va. An duh loh chhan ber hi rinna thil leh politics thil vang a ni a, damdawi lam thuneitute chuan Delta variant a darh mek avangin la hram turin an ngen.
Johns Hopkins University-in a chhinchhiah dan atanga chhutin, July 16 khan ni sarih chhungin ni tin mi 30,887-in hri kai ang an nih laiin July 30 kha chuan ni khatah mi 77,827-in kai ziah ang an ni tawh.
Thi pawh an pung leh hle tawh a. July 16 khan ni sarih chhungin ni tin mi 253 thi ang an nih laiin July 30 khan mi 358 thi ziah ang an ni a. Hri kai zingah damdawi in lut pawh an pung hle bawk.
Hri kai an pun leh tak avang hian kar hmasa khan CDC chuan invenna bikima la tawhte pawh vangtlang hmunah chuan hmai tuam zel turin an ti thar leh a. Agency hian vaccine la tawh zinga hri kai hian mi dang a kai ve thei zauh thei niin an sawi bawk.
“Delta variant a lo lan takah hian a hma aiin American-te invenna pek hi a tul lehzual ta a ni,” tiin CDC Director Rochelle Walensky chuan July 27-a thuthar lakhawmtute a kawmnaah a sawi.
US state tam tak chuan hri kai hmuh chhuah an nei tam leh hle tawh a. Florida chu a hmunpui thar ni mekin Inrinni khan ni khata kai hmuh tam ber ni tawkin mi 21,683 zetin an kai.
Florida-ah hian hri kai hmuh thar hmun ngaa thena hmun khat zet an awm.
Republican Governor Ron DeSantis chuan hmai tuam tur leh invenna la turin mipui a ti thar leh a, tual chhung thuneitute chu an huam chhunga inkhuahkhirhna kalpui turin thuneihna a pe bawk.
DeSantis hian Zirtawpni khan thla thara sikul kai leh tan turah sikul hnaihah hmai tuam turin a ti bawk a, hei hi kar hmasa pawh khan CDC-in a lo ti tawh.
Invenna latu an tlakhniam hnuah hri a darh thar leh mek lai hian invenna la pawh an pung leh bawk.
“Mipuite an harh thar leh chiah,” tiin National Institutes of Health Director Francis Collins chuan CNN-a State of the Union programme-ah Pathianni khan a sawi.