Covid-19 hri leng darh tanna, China-a tun hnaia darh thar leh mek chuan a awh zau zel a, tual chhung chanchinbute chuan inkai awl tak, Delta variant avangin an derthawng mek niin an tar lang hlawm.
Ni 10 liam ta lek chhungin hri kai mi 300 chuang an hmu tawh.
Tual chhung chanchinbute chuan hri tai darh thar leh hi an ziak nasa hle a, thawkna lam natnaa an specialist turu ber chuan an dinhmun chu ngaihven ngai hle a tih thu a sawi bawk.
Sorkar chuan zin veivah a khap nghal a, mi maktaduai tel endik a kalpui nghal bawk.
China-ah hian mi eng zat chiahin nge invenna la tawh hriat a ni lo va, an ram thuneitute erawh chuan dose tluklehdingawn 1.6 chuang an pe tawh tih an sawi.
Province leh municipalitiy 15-ah hri kai hi an awm tawh a, heng zinga hmun 12 hi chu khawchhak lam, Jiangsu province-a Nanjing khawpuia darh atanga kai chhawn zel an ni a. Thuneitute chuan an ram chhunga zin veivah hun lai a ni nen, Delta variant a nih bawk si avangin an pung chak hle thei niin an sawi.
China-ah hian hri kai hmuh thar awm nual mah se ram dangte ngaihtuah chuan a la tlem hle a. A hma lama inkai darhna a lo awm pawhin an thunun thei zel a, tun tumah pawh thunun tumin hma an la a; mahse, a hmaa mite lakah chuan tun hi a darh nasat ber tum a ni.
Global Times chuan tuna hri leng hi Wuhan-a a darh tan lai hnuah chuan a la nasa ber niin a sawi a, Covid laka invenna kalpuiah chuan kua a awm niin a tar lang.
“Pakhat lek pawhin province leh ram bial tam tak a nghawng chuan ngaihven a ngai hle tihna a ni a, hripui kan do dan pawh hi ennawn a ngai a ni,” a ti.
Hri tai darh thar leh avang hian vaccine chungchang pawh sawi rik a ni nasa hle a, a kai hmuh thar tam ber hi invenna la tawh an ni.
Centre for Disease Control & Prevention-a an researcher, Shao Yiming chuan invenna la tawhten an kai chiam hi an rin phak bak a nih thu Inrinni khan a sawi.
China-ah hian Sinovac leh Sinopharm siam vaccine an hmang ber a, heng damdawite hi Covid-19 kai lo turin 50% atanga 79% vela veng thei niin a kaite pawh natna lang chhuak lo tura ngaih an ni a, kai tak dal zo lo mah se damdawi in luh leh thihpui tur erawh a ven theih rin a ni.