Aizawl FC leh Churchill Brothers FC ten point khat insemin result an nei a. Zirtawpni tlaia I-League inkhelah 1-1 in an inhnehtawk.
Tilak Maidan-ah round 5 match hi an khel a. Churchill Brothers in goal khung turin an nghah rei a ngai lo. An striker thar, Aizawl FC striker hlui Kamo Stephane Bayi chuan minute 4-naah goal a khung nghal.
Churchill midfielder Lalawmpuia Sailo chuan freekick hlawhchhuakin tha takin a pet lut a. Ponif Vaz chuan Kamo khung turin a tauh rem a, goal hmahruai a lut.
First half-ah Churchill in bul tan tha zawk mahse Aizawl FC an insiamtha hret hret a. MS Dawngliana’n Aizawl FC goalkeeper hlui Albino Gomes chu save tha a siam tir.
Second half-ah Aizawl FC in minute 75-naah goal an khung ta a. Veilam atang Zodingliana Ralte ball cross chu Henry Kisseka chuan goal-ah chiang takin a khung.
Chak la nei lo Churchill Brothers in khelh nga atangin point hnih an hmu tawh a. Aizawl FC in point nga hmu in pariatna an ni.
Ningani chawhnu dar 2-ah NEROCA an tum leh ang.