Aizawl: Mizoram Larsap Hari Babu Kambhampati chuan Bangladesh sorkar leh sumdawngte chu India hmarchhak, a bikin Mizoramah an sumdawnna huang zauh zel turin a sawm.
Zirtawpni zana Bangladesh palaite leh India mi pawimawhte intawhkhawmna, ‘Silchar-Sylhet Festival’ hawnna inkhawm kaihhruaiin Larsap Kambhampati hian thu a sawi a. Silchar leh Sylhet khawpui chu insumdawn tawnna bakah culture ang hawi pawha tunhma atanga inzawmna nghet neiin, he inkungkaihna hi ram pahnihte inthian thatna tinghettu atan hman an duh tih a sawi.
India leh Bangladesh chu tunhma atang tawha thian tha an ni tih sawiin, he inlaichina hi kawng hrang hrangah hlawk taka hman tangkai zel ni se tha a tih a sawi.
Larsap hian India-in Act East Policy chak takin a kalpui mek tih sawiin, “He hmalaknaah inkalpawhna tha ngaihpawimawh a ni a. Tunah MEA-in KMMTTP project hmangin Mizoram chu India hmarchhak leh Kolkata lawngchawlhna kawngpuiah a siam dawn a ni,” a ti a, he project ngaihtuahna nen Bangladesh sorkar leh sumdawngte chu Mizoram lam lo hawi tel turin a sawm.
Silchar – Sylhet Festival 2022 hawnna inkhawmah hian Union Minister for Culture, Tourism & DoNER G.Kishan Reddy leh Dr AK Abdul Momen, Minister for Foreign Affairs, Bangladesh te chu khuallian an ni a. Parimal Suklabaidya, Assam Transport Minister leh Mohammad Mustafizur Rahman, High Commissioner of Bangladesh to India te chu khualzahawm an ni.
Silchar – Sylhet Festival 2022 hi Police Parade Ground Silchar-ah neih a ni a. India leh Bangladesh ramten insumdawn tawnna lian zawk leh ram pahnihte inlaichinna tinghet zual tura buatsaih a ni.