Aizawl: Rilru lama rualbanlo damlo, damdawi in atanga chhuak, hawna tur nei lo leh ngaihven zuitu nei lote tana din, Rehabilitation Home for Persons Cured of Mental Illness, SW&TA Complex, Ainawn venga mi chu Rualbanlote Ni (Inrinni) khan Social Welfare Minister Dr. K Beichhua-a’n a hawng.
Social welfare minister chuan khawvel thang chho zela rilru hmanna tur tam chho zelin rilru lama buaina (mental illness) a hring chhuak nasa nia sawiin, a enkawl kawngah mipui, kohhran leh khawtlang tanrual a tul thu a sawi.
Home-a thawkte chu an hnathawh chu Pathian rawngbawlna dik tak a nih thu hrilhin, an hna chu Isua hnathawh chhunzawm zelna a ni tih hre reng chunga khawngaihna leh inpekna rilru dik tak nena thawk turin a chah.
Inrinni vek khan Rualbanlote Ni-International Day of Disabled Persons chu Social Welfare Minister Dr K Beichhua hova hman a ni a. He ni pual hian Walkathon pawh buatsaih a ni bawk.