Raheem Sterling chuan Qatar atangin England World Cup squad chu a hawsan a. A in a misual an luhruk avangin London lamah a haw nghal.
Kum 27 mi Chelsea winger hi Pathianni zana Senegal nen round of 16 an khelh tum pawhin squad-ah a tel tawh lo.
Surrey Police chuan Inrinni zanah in neitute chhuah hlanin mi tu tih hriat loh an lo lut a, tlereuh awm angte leh sana te an ru tih an sawi.
Sterling-a aiawh chuan player hian a fate pathum a ngaihtuah avangin a haw nghal tih a sawi.
England manager Gareth Southgate chuan, “Football hi thil pawimawh ber a ni lova, chhungkua hi kan dah hmasak a tul thin.” tiin Sterling-a chungchang zawhna a chhang.
“A fate a ngaihtuah avangin hun siamsak kha kan duh a. Engtin nge kan kal zel ang tih chu ni te han liam se kan ngaihtuah zel ang.” tiin a sawi bawk.
England hian Inrinni zanah France hmachhawnin quarter-final an khel leh ang.
England team-mate Declan Rice chuan Senegal nen an inkhelh zawhah, “Tukin zinga tukthuan kan ei dawnin ka hmu a, a hnuah erawh manager in in lamah harsatna a neih thu kha a sawi a. Chuvangin team pumpui in kan ngaihven reng a ni tih kan hrilh theuh.” tiin a sawi bawk.
Sterling hi England squad atanga haw player pahnihna a ni a. November 30 khan Arsenal defender Ben White chu mimal harsatna avangin a lo haw tawh.