Gujarat assembly inthlan thawh hnihna, Thawhtannia neih chu tun hnaia police-in Muslim mipa thenkhat kut an thlak nia sawina khua, Kheda district-a Undhella khuaah chuan Muslim-te chuan an boycott.
Undhela khuaah hian October thla khan Muslim thenkhatin Navratri garba event neih lai chu lungin an vawm nia puh an nih avangin police-in khawlaiah nasa takin an vua.
Khuaa Muslim zawng zawngte chuan inthlan hi boycott-in vote thlak hun tawp hma darkar chanve a la awm thleng khan tumah vote thlak an la awm lo.
Muslim mipai, mi vawmtu nia puhte hi manin banah phuar beh an ni a, police-in tiangin an vua a. Officer-te hi uniform ha lo an ni a, an che lai hi mi tam takin thlirin kut pawh an beng hluah hluah a ni.
Inspector awm laiin heng mite hi ‘mipui hnena ngaihdam dil turin’ nawr luih an ni bawk.
He thil thleng chhuitu tur, inquiry committee chu din a ni a; mahse, tun thlengin eng report mah pek a la awm lo.
Thil thleng hian sawi zui pawh a hlawh nasa a, police chet dan chu ‘thlei bik nei’ nia sawi an awm laiin thenkhat chuan rang taka mi vawma mi tibuaitu an man chu an fak bawk.
News agency PTI chuan mi 150 rual vel inhawr khawmin temple hung chhunga garba event neih lai hi lungin an vawm a, thubuai ziah luh niin mi 43 hming a chuang niin a tar lang.
FIR thehluha tar lan a nih dan chuan he khuaa Muslim-te hian an mosque bul lawk Hindu temple-a garba huaihawt chu duh lovin an dodal sa a ni.
“Matar police station-a FIR thehluh a nih hnuah police-in mi 13 an man,” tiin Deputy Superintendent of Police VR Bajpai chuan PTI a hrilh a. Lunga invawmna a thlen hnuah hian khuaah hian police pawh thahnem tak an tir lut bawk.
“Sarpanch (khaw hotu)-in temple-ah garba a huaihawt a. Muslim rualten tawptir tumin an tibuai a ni,” tiin Bajpai chuan thuthar lakhawmtute hnenah a sawi.
A hmain Kheda Superintendent of Police Rajesh Gadhiya Muslim pa pahnih kaihhruai mi eng emaw zat chu Navratri Garba neihnaah kalin ‘buaina an siam’ tih a sawi tawh bawk.