Bangladesh atanga Mizorama tlan luh tum, Border Security Force-ten an thawn kir leh tak Zohnathlak mi 100 rualte chu Mizoram bul, ramri hrul ramhnuaiah an tangkhang mek a; Parva khua leh a chhehvela chengten a theih ang angin ei tur an pe.
Tar lan tawh angin Bangladesh sipai leh Kuki-Chin National Army (KNA) an inkah avanga an sahimna zawnga Mizorama luh tum mi 100 rual zet chu ramri an kân hmain BSF-ten Zirtawpni khan an nawr kir a, heng mite hi ramhnuaiah an tangkhang chhunzawm ta nia thudawn a ni.
Parva III atanga thudawnnain a sawi danin BSF-ten an hnawh kir takte zinga mite hian an chhungte, Parva III-a lut tawhte chu an bepawp a, ei tur an neih tawh loh thu leh nunaute nen ramhnuai hmun hulah an awm thu an hrilh a; Mizoram chhunga mite hian pawh tum mah se BSF-te hian pawh an rem ti lo thung a ni.
Ramhnuaia tangkhang mek zinga thenkhat chu BSF-te hriat lohin a ruka ralin khaw mite chuan ei tur an pe nia thudawn a ni a, heng mite hian Mizoram luh ngei chu an la tum a ni. Tuna Parva III-a raltlan awm mekte chuan nimin atang khan khaw daiah an awmna tur buk an sa tan a, khaw chhung miten buk sakna tur hmanruate pawh an pe a ni.
Tun dinhmunah Parva III-ah hian Bangladesh raltlan mi 295 an awm mek a, an zingah hian dam tha chiah lo enkawl ngaite pawh an awm nia thudawn a ni bawk.